Shymkentte 1500-den astam úı men birqatar nysan gazsyz qaldy
ShYMKENT. KAZINFORM – Shymkentte gaz qubyrynyń zaqymdanýyna baılanysty shamamen 1500 jeke úı, jeti kópqabatty turǵyn úı, sondaı-aq kommýnaldyq-turmystyq jáne ónerkásiptik nysandarǵa gaz berý ýaqytsha toqtatyldy.
«QazaqGaz Aimaq» AQ Shymkent óndiristik fılıalynyń málimetinshe, 24 tamyz kúni saǵat 23:33-te Qaratóbe tasjoly, 38/1 mekenjaıyndaǵy gaz qubyrynyń zaqymdanǵany týraly habar avarııalyq-dıspetcherlik qyzmetke túsken. Avarııalyq brıgada oqıǵa ornyna saǵat 23:56-da jetken. Aldyn ala málimet boıynsha, qoldanystaǵy jerasty polıetılen gaz qubyry kóldeneń baǵyttalǵan burǵylaý ádisimen jer qazý jumystary kezinde zaqymdanǵan.
– Aldyn ala málimet boıynsha, «Brım» JShS jer qazý jumystaryn júrgizý kezinde Shymkent óndiristik fılıalynyń balansyndaǵy gaz qubyryn zaqymdaǵan. Saldarynan gaz shyǵyp, órt tutanǵan. Ashyq jalyn júk kóligi men burǵylaý jabdyqtaryn sharpyǵan, – dep habarlady kompanııa.
Avarııalyq brıgada gazdyń shyǵýyn oqshaýlap, 200 mıllımetrlik gaz qubyrynyń tıisti bóligin japty. Tótenshe jaǵdaılar mınıstrliginiń bólimsheleri órtti sóndirip, jalynnyń jaqyn mańdaǵy turǵyn úılerge taralýyna jol bermedi.
50 metr radıýsta gazdyń taralýy anyqtalǵan joq. Gaz qyzmeti men merdiger uıym jumysshylary arasynda zardap shekkender tirkelmedi.
Apat saldarynan gaz berý ýaqytsha toqtatylyp, jeke sektordaǵy shamamen 1500 úı, jalpy 340 páterli jeti kópqabatty turǵyn úı, 11 kommýnaldyq-turmystyq nysan jáne toǵyz ónerkásiptik kásiporyn gazsyz qaldy.
– Aldyn ala málimet boıynsha, qoldanystaǵy gaz qubyryn jer qazý jumystary kezinde zaqymdaǵan «Brım» JShS kináli tarap bolyp otyr. Oqıǵanyń naqty sebepteri men jaýapkershilik deńgeıi tehnıkalyq tekserý, sondaı-aq jumys júrgizýge qajetti ruqsat qujattary men kelisimderdi tekserý nátıjeleri boıynsha anyqtalady, – dep atap ótti «QazaqGaz Aimaq» AQ.
Oqıǵa ornyna Eńbekshi aýdandyq polıtsııa basqarmasynyń qyzmetkerleri shaqyryldy. Fılıal mamandary topyraqty arshý, zaqymdaný kólemin anyqtaý jáne qalpyna keltirý jumystaryn júrgizip jatyr. Keltirilgen zalal baǵalanǵannan keıin ony kináli taraptan óndirip alý máselesi qaralady.
Buǵan deıin Shymkentte apat saldarynan birneshe shaǵynaýdanda jaryq pen gaz óship qalǵanyn jazǵan edik.
