Shymkentte 1,5 saǵatqa sozylǵan kúrdeli ota sábıdiń ómirin saqtap qaldy

ShYMKENT. KAZINFORM - Shymkent qalalyq perınataldyq ortalyǵynda týa bitken ishek aqaýymen dúnıege kelgen nárestege kúrdeli operatsııa jasaldy.

41 aptalyq merzimde 3450 gramm salmaqpen aýyr halde týǵan shaqalaqqa eki kúninde shuǵyl túrde ota jasaldy. Neonataldy hırýrgııa salasyndaǵy zamanaýı ádisterdi qoldanǵan ota 1,5 saǵatqa sozylǵan. Operatsııa mindetti áleýmettik medıtsınalyq saqtandyrý júıesi aıasynda joǵary bilikti mamandardyń qatysýymen ótti.

Shymkent qalalyq perınataldyq ortalyǵynyń neonatolog-reanımatology Aǵzat Sholpanqulovanyń aıtýynsha, der kezinde jasalǵan operatsııa jańa týǵan náresteniń ómirin saqtap qalýǵa múmkindik berdi. 

– Náreste ishek aqaýynyń patologııasymen dúnıege keldi. Dıagnostıkalyq tekserýlerden keıin dereý operatsııa jasaý týraly sheshim qabyldadyq. Mundaı kúrdeli neonataldy operatsııalar sábılerdiń ómirin aman saqtap qalýǵa zor múmkindik beredi. Sábı aldaǵy ýaqytta turaqty baqylaýda bolady, – dedi maman.

Shymkent qalalyq perınataldyq ortalyǵynda jyl basynan beri ishki aǵzalarynda túrli aqaýy bar 30-ǵa jýyq jańa týǵan sábıge kúrdeli operatsııa jasalǵan. Munda neonataldy jansaqtaý jáne qarqyndy terapııa bólimshesi jumys isteıdi. Ásirese asqazan-ishek joldaryna ota jasalǵan balalarǵa operatsııadan keıingi kezeńde erekshe kútim qajet. 

Aıta keteıik, budan buryn Shymkentte úshem dúnıege kelgenin jazǵan bolatynbyz.