Shymkentte 14 myńnan astam ana mereke qarsańynda qosymsha járdemaqy alady

ShYMKENT. KAZINFORM — Halyqaralyq áıelder kúnine oraı, Shymkentte kópbalaly analar bir rettik áleýmettik tólem alady. Memlekettik járdemaqylarǵa qosymsha qoldaý 14 267 áıelge tıesili.

8 naýryzǵa arnalǵan birjolǵy tólem «Altyn alqa» jáne «Kúmis alqa» ıegerlerine, «Batyr ana» ataǵyn alǵan áıelderge, І jáne ІІ dárejeli «Ana dańqy» ordenderimen marapattalǵandarǵa beriledi.

— Merekelik járdemaqy 2026 jyldyń 8 naýryzdaǵy jaǵdaı boıynsha Shymkentte turaqty tirkelgen áıelderge tólenedi. Barlyǵy qalada 14 267 anaǵa materıaldyq qoldaý kórsetý josparlanǵan, — dep habarlady qala ákimdigi.

Birjolǵy áleýmettik tólem 5 aılyq eseptik kórsetkish kóleminde (21 625 teńge) beriledi. Qarajat jergilikti bıýdjetten bólindi.

Alýshylardyń tizimderi «Azamattarǵa arnalǵan úkimet» memlekettik korporatsııasynyń derekteri negizinde avtomatty túrde qalyptasatyn bolady. Eshqandaı ótinishter talap etilmeıdi, tólemder belgilengen tártippen júzege asyrylady.

Aıta keteıik, 2026 jyldyń 1 qańtarynan bastap memleket balaly otbasylarǵa beriletin áleýmettik tólemderdi 10%-ǵa arttyrdy. Bıyl qańtar aıynda kópbalaly otbasylarǵa jáne nagradtalǵan analarǵa beriletin memlekettik járdemaqylarmen 875,2 myń otbasy jalpy somasy 56,5 mlrd teńge mólsherinde qamtyldy.