Shymkentte 1,35 mlrd teńgeden astam bıýdjet qarajatyn jymqyrǵan bes adamǵa sot úkimi shyqty
ASTANA. KAZINFORM — Shymkentte 1 mlrd 351 mln teńgeden astam bıýdjet qarajatyn jymqyrýǵa qatysty rezonansty qylmystyq is boıynsha bes adamǵa úkim shyqty. Bul týraly qalalyq sot habarlady.
Sot málimetinshe, aıyptalýshylar jalǵan qujat rásimdep, Ulttyq bilim berý derekter bazasyna ádeıi jalǵan málimetter engizgen. Nátıjesinde memleketke 1 mlrd 351 mln 527 myń 344 teńge kóleminde materıaldyq shyǵyn keltirilgen.
Іs boıynsha negizgi aıyptalýshy asa iri kólemdegi alaıaqtyq jáne qylmystyq jolmen alynǵan qarajatty zańdastyrý baptary boıynsha kináli dep tanylyp, múlki tárkilenip, 10 jylǵa bas bostandyǵynan aıyryldy. Sondaı-aq oǵan 10 jyl boıy jalpy bilim berý uıymdarynda basshylyq qyzmet atqarýǵa tyıym salyndy.
Sot onyń buryn da sottalǵanyn eskerip, jazasyn qaýipsizdigi barynsha joǵary qylmystyq-atqarý júıesi mekemesinde óteýdi belgiledi.
Qalǵan tórt aıyptalýshy asa iri kólemdegi alaıaqtyqqa kómekteskeni úshin kináli dep tanylyp, 4 jyldan 8 jylǵa deıingi merzimge bas bostandyǵynan aıyryldy. Olar jazalaryn ortasha qaýipsizdik mekemelerinde óteıtin bolady.
Sottyń anyqtaýynsha, kúdiktiler uıymdasqan túrde áreket etken. Olardyń biri oqý ornynyń quryltaıshysy, ekinshisi kolledj dırektory bolsa, qalǵandary býhgalter qyzmetin atqarǵan.
Tergeý barysynda Ońtústik Qazaqstan gýmanıtarlyq-qarjy kolledji is júzinde bilim berý qyzmetin júrgizbegeni anyqtaldy. Sonymen qatar Ońtústik Qazaqstan joǵary medıtsına kolledjinde aqyly bólimde oqyǵan stýdentter jalǵan buıryqtar arqyly zańsyz túrde memlekettik bilim berý tapsyrysy boıynsha bilim alýshylar retinde rásimdelgen.
Sot protsesi kezinde aıyptalýshylar, olardyń týystary men advokattary foto jáne beınetúsirilim júrgizýge qarsylyq bildirdi. Ázirge taraptardyń úkimge shaǵym túsiretini belgisiz. Sot úkimi zańdy kúshine engen joq.
Aıta keteıik, osy qylmystyq shemaǵa qatysty basqa is boıynsha buǵan deıin Ulttyq qaýipsizdik komıtetiniń burynǵy qyzmetkeri men oblystyq bilim basqarmasynyń eks-basshysy da naqty merzimge sottalǵan bolatyn. Tergeý men sottyń qorytyndysyna sáıkes, olar negizgi aıyptalýshy uıymdastyrǵan qylmystyq shemaǵa qatysy bar dep tanylǵan.
Eske sala keteıik, buǵan deıin Túrkistan oblysynda mekteptiń burynǵy dırektory sybaılas jemqorlyq úshin sottalǵan bolatyn.
