Shymkentte 1300-den asa oqýshyǵa ystyq tamaq vaýcheri rásimdelmegen

ShYMKENT. KAZINFORM — Oqýshylardy tegin ystyq tamaqpen qamtamasyz etý úshin vaýcherlik júıege tirkelý qajet. 

Shymkent qalasy ákiminiń orynbasary, ákimdiktiń resmı ókili Sársen Quranbektiń aıtýynsha, bıyl 1 qyrkúıekten bastap barlyq mektepterde «Áleýmettik ámııan» ıntegratsııalanǵan apparattyq-baǵdarlamalyq keshender ornatylǵan. Bul júıe arqyly oqýshylardy ystyq tamaqpen qamtamasyz etý úshin vaýcher rásimdelýi tıis.

— Qalada 1-4 synyp aralyǵynda ystyq tamaqpen qamtylýy tıis 75 815 oqýshy, al 5-11 synyptarda áleýmettik az qamtylǵan otbasylardan shyqqan 21 494 oqýshy bar. Alaıda, bıýdjet esebinen ystyq tamaqpen qamtylatyn jalpy 97 309 oqýshynyń 1336-syna áli kúnge deıin vaýcher rásimdelmegen. Muny rásimdemese, oqýshylar ystyq tamaq ishe almaıdy, — dedi ol.

Resmı ókildiń aıtýynsha, memleket usynǵan jeńildikti paıdalanbaı, vaýcherdi rásimdemeý — mektep basshylarynyń kinási.

— Osyǵan baılanysty oqýshylardyń ata-analaryna 1414 egov platformasy arqyly sms-habarlamalar jiberildi. Sms-ti qabyldamaǵan ata-analar men osy baǵytta júıeli túrde jumys istemegen mektepter bar. Buǵan mektep basshylary kináli. Ásirese, qaladaǵy № 135, 151, 149 mektepterde 369 oqýshy vaýcherdi rásimdeý múmkindiginen tys qalǵan. Ata-analar bul máseleni mektep basshylyǵynan talap etýi kerek, — dedi ol.

Budan buryn Shymkentte balabaqsha qyzmetkerlerine 3 aı boıy áleýmettik aýdarymdar tólenbegenin jazǵan edik.