Shymkentte 13 kásiporyn 90 qyzmetkerge 133 mln teńgeden astam jalaqy qaryz

ShYMKENT. KAZINFORM - Shymkent qalasyndaǵy birqatar kásiporynda jalaqy boıynsha bereshek máselesi áli de ózekti kúıinde qalyp otyr.

Qazirgi tańda 13 kásiporyn 90 qyzmetkerge 133 mln teńge kóleminde jalaqy tólemegeni anyqtalǵan. Bereshek somasy boıynsha kósh bastap turǵan – «Shymkenthımmontaj» jaýapkershiligi shekteýli seriktestigi. Bul kásiporyn úsh jumysshysyna 19 mln teńge kóleminde eńbekaqy bereshek. Budan bólek, «Total Industry» JShS – 4 jumysshyǵa 4,7 mln teńge, al «Hlopkoprom-Tsellıýloza» JShS – 7 jumysshyǵa 5,7 mln teńge qaryz. Sonymen qatar, taǵy 2 kásiporynda 4 jumyskerge 1,76 mln teńge kóleminde merzimi ótken jalaqy bereshegi bar. 
Alaıda eń kúrdeli jaǵdaı – bankrottyq jáne ońaltý rásimindegi 8 kásiporynda baıqalyp otyr.

Bul kásiporyndar 72 jumyskerge 102 mln teńge kóleminde jalaqy bereshegin óteýge tıis. Atalǵan soma jalpy bereshektiń 77 paıyzyn qurap otyr. 

- Biz óz tarapymyzdan qarap otyrǵan joqpyz. Іs – qımyl jasap jatyrmyz. Bereshekter tolyǵymen oryndalǵansha ýákiletti organdarmen ózara is qımylda bolamyz. Jalaqy bereshegin qordalanbaýy biz úshin ózekti jáne kún tártibinen túspeıtin bolady, - dedi Memlekettik eńbek ınspektsııasy komıtetiniń Shymkent qalasy boıynsha departamenti basshysy Jeńis Maqulbaev.

Taǵy bir aıta keter másele, jyl basynan beri qala aýmaǵynda 13 óndiristik jazataıym oqıǵa tirkelip, sonyń saldarynan 9 adam aýyr jaraqat alyp, 4 adam kóz jumǵan. Oqıǵalardyń negizgi sebepteri retinde jumysty uıymdastyrýdaǵy kemshilikter, qaýipsizdik sharalarynyń tolyǵymen qamtamasyz etilmeýi jáne jumysshylar tarapynan jol berilgen óreskel abaısyzdyqtar men jol-kólik oqıǵalary kórsetilýde.

Aıta keteıik, budan buryn Shymkentte ákimdiktiń 54 qyzmetkeri qumar oıynǵa boı aldyrǵanyn jazǵan bolatynbyz.