Shymkentte 12 jeke sot oryndaýshysy lıtsenzııasynan aıyryldy
ShYMKENT. KAZINFORM – Shymkent qalasynyń prokýratýrasy júrgizgen tekserý nátıjesinde jeke sot oryndaýshylary tarapynan zań buzýshylyqtar anyqtalyp, 12 sot oryndaýshysy memlekettik lıtsenzııasynan aıyryldy.
Qadaǵalaý organy jeke sot oryndaýshylarynyń boryshkerlerdiń Qazaqstan Respýblıkasynan shyǵýyna buryn qoıylǵan shekteýlerdi zańsyz alyp tastaǵanyn, sondaı-aq atqarýshylyq is júrgizýdi zańsyz qozǵaǵanyn anyqtaǵan. Atap aıtqanda, keıbir jeke sot oryndaýshylary eńbek demalysynda bolǵan kezeńde olardyń kómekshileri atqarýshylyq is júrgizýdi qozǵaǵan faktiler tirkelgen.
- Anyqtalǵan zań buzýshylyqtarǵa baılanysty QR Ádilet mınıstriniń atyna zańdylyqty buzýshylyqtardy joıý týraly usynys engizildi. Usynysty qaraý nátıjesinde 85 jeke sot oryndaýshysy tártiptik jaýaptylyqqa tartylyp, olardyń birqataryna qatysty jeke sot oryndaýshysy qyzmetimen aınalysý quqyǵyna berilgen memlekettik lıtsenzııadan aıyrý týraly sotqa talap qoıý joldandy.
QR Ádilet mınıstrliginiń talap qoıýy sotta qanaǵattandyrylyp, nátıjesinde 12 jeke sot oryndaýshysy lıtsenzııasynan aıyryldy. Sot aktisi zańdy kúshine engen, - dep jazdy prokýratýradan.
Prokýratýra organdary atqarýshylyq is júrgizýdiń zańdylyǵyn turaqty túrde qadaǵalaıtynyn jáne mundaı buzýshylyqtar anyqtalǵan jaǵdaıda olardy joıý, sondaı-aq kináli tulǵalardy jaýaptylyqqa tartý boıynsha tıisti sharalar qabyldaıtynyn málimdedi.
Aıta keteıik, Almatyda aryzdanýshyǵa tıesili 370 mln teńgeni ıemdenip alǵan sot oryndaýshysy sottaldy.
