Shymkentte 100-ge kelgen ardagerge qurmet kórsetildi
ShYMKENT. KAZINFORM - «Ónegeli urpaq» aptalyǵy aıasynda Shymkentte qarııalar men ardagerler úıin tazalaý, shóp oryp, qoqystardy shyǵarý, aǵashtardy ákteý jumystary júrgizilip, qurmet kórsetildi.
«Taza Qazaqstan» aktsııasy aıasynda Shymkent qalasy ákiminiń orynbasary Sársen Abaıuly bastaǵan bir top belsendiler, stýdent jastar, eriktiler UOS ardageri Nına Mosýnovanyń shańyraǵyna bas suqty. Jastar aýlany tazartyp, aǵash túpterin qopsytty. Qorshaýlardy syrlady.
Búginde Shymkentte eki-aq soǵys ardageri qalǵan. Sonyń biri – Nına Mosýnova. Qarııa bıyl 100-ge kelip otyr. Ol 1942 jyly áskerge óz erkimen attanyp, Mojaısk mańyndaǵy soǵysta qolyna pýlemet alyp jaýǵa qarsy shyqqan. Soǵystan soń kassır, kitaphanashy, hatshy-mashınıstka bolǵan. Qazirgi tańda 2 nemere, 5 shóbere súıip otyr.
– Bizge beıbit ómir syılaǵan Ekinshi dúnıejúzilik soǵystyń jáne tyl ardagerleriniń erligin baǵalaý – bizdiń paryzymyz. Biz – ardagerlerimizdi ardaqtap, qarttarymyzdy qadirleıtin halyqpyz. Endigi paryzymyz kózi tirisinde osy kisilerge barynsha qamqorlyq jasap, kómegimizdi aıamaý. Sizge Uly Jeńis pen búgingi beıbit kúnderimiz úshin alǵys aıtamyz, – dedi Shymkent qalasy ákiminiń orynbasary Sársen Quranbek.
Nına ájeı qala ortalyǵyndaǵy alaqandaı úıde nemeresiniń qamqorlyǵynda turyp jatyr. Jınalǵan jastarǵa rızashylyǵyn aıtyp, jylap qaldy. Otan úshin otqa túsip, qan maıdanda jetken jeńisi, búgingi beıbit ómir úshin bas ıip, alǵys bildirdi. «Endi soǵys degen zulmatty jastar kórmesin. Elimizde tek beıbitshilik bolsyn!» dedi qart ana.
