Shymkentte 100-den astam zańsyz qurylys nysany anyqtaldy
Shymkent qalasynda memlekettik sáýlet-qurylys baqylaýy kúsheıtildi. Tekserý barysynda qurylys erejeleri men jumys sapasyna qoıylatyn talaptardy buzǵan ondaǵan kompanııa baqylaýǵa alyndy.
Jyl basynan beri Shymkent qalasynda qurylys normalary men zań talaptaryn buza otyryp salynǵan 106 nysan anyqtaldy. Onyń 56-syna ákimshilik sharalar qabyldandy.
Eń kóp zańbuzýshylyq Abaı aýdanynda tirkelip, munda 39 zańsyz nysan anyqtalǵan. Qarataý aýdanynda 21 zańsyz qurylys alańy tabylsa, Ál-Farabı aýdanynda — 19, Eńbekshi aýdanynda — 17, al Turan aýdanynda 10 derek anyqtalǵan.
Tekserý barysynda mamandar 72 qurylys alańyn qarap, jalpy somasy 61,6 mln teńge aıyppul saldy.
59 nysan boıynsha zańsyz qurylys júrgizgeni úshin 42,4 mln teńge kóleminde aıyppul jazyldy. Taǵy 8 nysanda qurylys jumystary sapasynyń talaptary buzylǵany úshin 8,6 mln teńge óndirildi. Al turǵyn úı qurylysyna úlestik qatysý týraly zań talaptaryn saqtamaǵan bes nysanǵa 10,6 mln teńge aıyppul taǵaıyndaldy.
— Lıtsenzııalyq baqylaý aıasynda 442 qurylys kompanııasy jaýapkershilikke tartyldy. Jalpy aıyppul kólemi 86,1 mln teńge boldy. Uıymdardyń lıtsenzııalary 6 aıǵa toqtatyldy, — dep habarlady qalalyq jaıly ortany damytý basqarmasy.
Tekserý qorytyndysy boıynsha jergilikti bıýdjetke jalpy 147,6 mln teńge óndirildi.
Aıta keteıik, Almatynyń ortalyǵyndaǵy zańsyz nysan sot sheshimimen buzyldy.
