Shymkentte 100-den asa nysan qujatty tolyq rásimdemeı qurylys júrgizgen

ShYMKENT. KAZINFORM — Bıyl Shymkentte zańsyz qurylystarǵa qatysty 125 nysanǵa ákimshilik hattama toltyrylyp, 70 mln teńgeden astam aıyppul salynǵan.

Qalalyq orta sapasy jáne baqylaý basqarmasynyń málimetinshe, jyl basynan beri úlestik qatysý týraly zańnama talaptaryn buzǵan 15 turǵyn úı kesheni anyqtalǵan. Olarǵa salynǵan aıyppuldyń 7 mıllıon teńgeden astamy óndirilgen.

Aıyppulǵa ilingenderdiń qatarynda «Kerege Busines», «Sofia», «Alpamys», «Grand Alataý», «Parasat Residence» sekildi turǵyn úı keshenderi bar.

Sondaı-aq monıtorıng nátıjesi men turǵyndardyń shaǵymy negizinde 25 qurylys nysany boıynsha sotqa aryz joldanǵan. Onyń 11-i qanaǵattandyrylǵan, 2-i qanaǵattandyrýsyz qaldyrylǵan. Al 12 aryz qaralyp jatyr.

— Búgingi tańda Shymkentte zańsyz salynǵan qurylystardy buzý jumystary júrgizilip jatyr. Máselen, «REAL PACK», «Keı-Park» JShS-y men «Jastar» Ońtústik Qazaqstan oblystyq dene-shynyqtyrý-sport qoǵamy» qoǵamdyq birlestigine tıesili qurylys nysandaryn buzý týraly talap aryz sot sheshimimen qanaǵattandyryldy. Atalǵan qurylys nysandaryn buzý jumystary aıaqtaldy, — dedi basqarma basshysynyń orynbasary Aldııar Musabaev.

Vedomstvo málimetinshe, qala aýmaǵyndaǵy 185 nysanǵa qurylys-montajdaý jumystary boıynsha monıtorıng júrgizilgen. Onyń ishinde 102 nysan tıisti qujattardy tolyq rásimdemeı qurylysty júrgizgeni anyqtalǵan. Nátıjesinde 41 nysanǵa aıyppul salynsa, qalǵan 61-ne tekserý júrgizilip jatyr.

Budan buryn Shymkentte qurylys alańynda jumysshy qaza tapqanyn jazǵan edik.