Shymkentte 10-nan astam jekemenshik balabaqsha jabyldy
ShYMKENT. KAZINFORM – Vaýcherlik júıe engizilgennen keıin Shymkentte birneshe jekemenshik balabaqsha jumysyn toqtatty. Al memlekettik tapsyrys pen tólemaqyǵa qatysty sheshimder ózgermegen.
Shymkent qalasy ákiminiń orynbasary, ákimdiktiń resmı ókili Sársen Quranbektiń aıtýynsha, shaharda 10-nan astam jekemenshik balabaqsha jumysyn toqtatqan. Buǵan deıin mektepke deıingi uıymdardy qarjylandyrýdyń jańa tetigi – vaýcherlik júıe engizilip, saladaǵy birqatar zańsyzdyq anyqtalǵan bolatyn.
Spıkerdiń sózinshe, berilgen vaýcher bala alty jasqa tolǵanǵa deıin saqtalady.
– Buryn balalar bir orynda uıyqtap, sol jerde oınap, sol orynda tamaqtanatyn, ıaǵnı talapqa saı jumys istemeıtin balabaqshalar boldy. Qazir de bar, alaıda olardyń sany azaıyp keledi. Qalada 600-den astam balabaqsha bolsa, onyń 71-i – memlekettik. Memlekettik balabaqshalardyń birde-biri jabylǵan joq. Al jekemenshik balabaqshalardyń 12-si jabyldy. Áli de jabylyp jatqandary bar, – dedi ol.
Búginde jekemenshik balabaqshalardyń jabylýyna qaramastan, qaladaǵy balabaqshalar sany 645-ke jetken.
Sondaı-aq áleýmettik jelilerde jekemenshik balabaqshalarda tólemaqy ósedi, memlekettik tapsyrys boıynsha kelisimsharttar uzartylmaıdy jáne birqatar mektepke deıingi uıymdar jabylýy múmkin degen aqparat tarady. Qala ákimdigi bul málimetterdiń shyndyqqa janaspaıtynyn málim etti.
– Jekemenshik balabaqshalardyń qyzmeti, memlekettik tapsyrys sheńberindegi qarjylandyrý máseleleri, ata-analardyń tólemaqysy jáne ózge de uıymdastyrýshylyq tetikter Oqý-aǵartý mınıstrligi tarapynan júzege asyrylyp jatqan pılottyq joba aıasynda qoldanystaǵy zańnama talaptaryna sáıkes retteledi. Qazirgi tańda jekemenshik mektepke deıingi uıymdardyń jabylýy nemese memlekettik tapsyrys kelisimsharttarynyń toqtatylýy men tólemaqynyń qymbattaýy týraly eshqandaı sheshim qabyldanbaǵan, – delingen qalalyq bilim basqarmasy usynǵan aqparatta.
Sonymen qatar vedomstvo ókilderi ata-analar men azamattardy tek resmı aqparat kózderine súıenýge, tekserilmegen jáne jalǵan málimetterdi taratpaýǵa shaqyrdy.
– Qosymsha aqparat alý úshin tıisti memlekettik organdardyń resmı ınternet-resýrstary men baılanys arnalaryna júginýlerińizdi suraımyz, – delingen málimette.
Budan buryn Shymkenttegi 83 mektepte muǵalimderdiń júktemesi normadan asyp ketkenin jazǵan edik.