Shymkentte 10 kún boıy salt-dástúr nasıhattalady
ShYMKENT. KAZINFORM — Shymkent qalasynyń turǵyndary búgin «Qaıyrymdylyq» kúnin atap ótedi. Іs-sharalar barysynda qarttar úıi men balalar úıinde jáne kópbalaly otbasylarǵa arnalǵan merekelik baǵdarlamalar uıymdastyrylady. Sondaı-aq, áleýmettik turmysy tómen otbasylar men zııaly qaýym ókilderine aýyzashar beriledi.
Jalpy qala turǵyndary Naýryz merekesin 10 kún boıy atap ótedi. Keshe Amal kúnine oraı qala aýmaǵynda birneshe is-shara uıymdastyryldy. Al, búgingi qaıyrymdylyq kúninde de ıgi ister jalǵasyn tabady.
16 naýryz — «Mádenıet jáne ulttyq salt-dástúr kúni» — Naýryz alańynda «Súıinshi suraý», «Balaǵa at qoıý», «Besikke salý», «Jaqsynyń ornyna aýnatý», «Tusaýkeser», «Ashamaıǵa mingizý», «Qulaq tesý», «Burymyn órý», «Qyzdy oń bosaǵaǵa otyrǵyzý», «Qyz uzatý», «Betashar», «Tileý kóje daıyndaý» ǵuryptary nasıhattalyp, mýzykalyq-teatrlandyrylǵan qoıylym kópshilik nazaryna usynylady.
17 naýryz — «Shańyraq kúni» aıasynda perzenthanalarda jańa týǵan nárestelerdiń ata-analaryna «Naýryz bazarlyq» estelik kádesyılary tabystalady.
18 naýryz — «Ulttyq kıim kııý» kúni aıasynda Shymkent qalasynyń memlekettik qyzmetkerleri ulttyq kıim kııý chellendjin bastaıdy. Sondaı-aq, Kórme ortalyǵynda úsh nomınatsııadan turatyn «Eń úzdik balalar men jasóspirimderdiń kıim úlgisi», «Eń úzdik kúndelikti kıim úlgisi», «Eń úzdik jumys kıim úlgisi» atty ulttyq kıim dızaınerleriniń baıqaýy ótedi.
19 naýryz — «Jańarý kúni» aıasynda qalanyń saıabaqtarynda kóktemgi aǵash egý dástúri qolǵa alynbaq.
20 naýryz — «Ulttyq sport kúni» ıppadromda báıge, aýdaryspaq, kókpar, jamby atý, dástúrli sadaq atý, teńge ilý syndy ulttyq sport oıyndarynan jarystar uıymdastyrylady.
21 naýryz — «Yntymaq kúni» zııaly qaýym ókilderi men qoǵam qaıratkerleri qala turǵyndaryn naýryz merekesimen quttyqtaıdy.
22 naýryz — «Jyl basy» Astana alańynda «Armysyń, áz-Naýryz» atty sahna ónerindegi etnıkalyq jáne zamanaýı úrdisterdi úılestiretin mýzykalyq teatrlandyrylǵan qoıylym kórsetiledi. Sonymen qatar, «Ál-Farabı» jáne Naýryz alańdarynda, «Jeńis» saıabaǵynda, Saıram turǵyn alabyndaǵy «Naýryz» saıabaǵynda, «Qajymuqan» atyndaǵy ortalyq stadıonda merekelik dýmandy is-sharalar ótedi. Saltanatty shara keshki gala-kontsertke ulasady. Onda elimizdiń óner juldyzdary «Orda» toby, «Er Turan», Qanay, Nazıma jáne Shymkent qalalyq mádenıet úıi ónerpazdary men «Qazyna», «Qaragóz», «Shamsınur», «Shattyq» bı ansamblderi óner kórsetedi.
23 naýryz — «Tazarý kúni» tazalyq estafetasyn bastap, qalanyń kórikti jerleri men saıabaqtarynda, merekeden keıingi qaldyq zattardan tazalaý jalpyulttyq senbilik uıymdastyrylady.
