Shymkentte 10 kóshede asfalt jabyny shógip ketti
ShYMKENT. KAZINFORM — Shymkent qalasyndaǵy Nurtas shaǵynaýdanynda 10 kóshede jol shógip, asfalt jabyny búlingen.
Qala ákimdiginiń málimetinshe, Nurtas shaǵynaýdanynda asfalt jabynynyń tómen túsýi anyqtalǵan kóshelerde qurylys jumystaryn «Taraz Stroı 2004» merdiger mekemesi júrgizgen.
— Bul kóshelerde 2023 jyly káriz júıesin júrgizý jumysy bastalyp, 2024 jyly memlekettik qabyldaýǵa ótkizilgen. Alaıda sońǵy jaýyn-shashynnan keıin asfalttyń birneshe tusy tómendep, jol jabynynyń buzylýyna ákeldi, — delingen vedomstvo taratqan aqparatta.
Qazirgi tańda ákimdik tarapynan merdiger mekemege asfaltty qalpyna keltirý boıynsha naqty tapsyrma berilgen. Sonymen qatar qalalyq energetıka jáne ınfraqurylymdy damytý basqarmasyna jumysty qadaǵalaý mindeti júkteldi.
— Jóndeý barysynda joldyń negizi nyǵaıtylyp, qaıta asfalt tóseledi. Kompanııa jumysty osy aptada bastap, qysqa merzimde aıaqtaýdy josparlap otyr, — dep málimdedi qala ákimdigi.
Budan buryn Shymkentte káriz kollektorynyń isten shyǵýyna baılanysty joldyń qaq ortasynda asfalt opyrylyp, sýǵa tolǵan tereń shuńqyr paıda bolǵanyn jazǵan edik.