Shymkentte 1 qazannan bastap qoǵamdyq kólik kartasynyń baǵasy ózgeredi
ShYMKENT. KAZINFORM — Shymkentte qoǵamdyq kólik kartasynyń quny 1 qazannan bastap 550-den 800 teńgege deıin kóteriledi. Kompanııa bul ózgeristi kartany daıyndaý jáne logıstıka shyǵyndarynyń ósýimen baılanystyryp otyr.
«Smart Mobility» JShS dırektory Aqylbek Ahmetýalıdyń aıtýynsha, baǵanyń ósýine kartany daıyndaý, logıstıka jáne basqa da operatsııalyq shyǵyndar áser etken. Onyń sózinshe, bir kartanyń ózindik quny shamamen 780 teńgege jetken.
— 1 qazannan bastap kólik kartasynyń baǵasyn 800 teńgege kóterýge májbúr bolyp otyrmyz. Bul — operatsııalyq shyǵyndardyń ósýine baılanysty qabyldanǵan sheshim. Sondyqtan qala turǵyndaryna, onyń ishinde mektep oqýshylary men stýdentterge, kartany qazan aıyna deıin qazirgi baǵamen alyp úlgerýge múmkindik berip otyrmyz, — dedi ol.
Kompanııa ókiliniń sózinshe, kartanyń baǵasyn kóterý týraly sheshim ótken jyly qabyldanýy tıis bolǵan. Alaıda turǵyndarǵa qolaıly bolý úshin quny bir jyl boıy 550 teńge deńgeıinde saqtalǵan.
Qazir Shymkentte 200 myńnan astam adam kólik kartasyn paıdalanady. Onyń 80 myńǵa jýyǵy — mektep oqýshylary. Jalpy, qalada qoǵamdyq kólikpen kún saıyn 350 myńnan astam jolaýshy qatynaıdy.
Aqylbek Ahmetýalıdyń aıtýynsha, kartanyń vırtýaldy nusqasyn da paıdalanýǵa bolady. Ol úshin arnaıy avtobýs qosymshasyn smartfonǵa júktep, qajetti málimetterdi engizý qajet.
Al oqýshylar kólik kartasyn alý úshin Shymkent qalasyndaǵy mektepte oqıtynyn rastaıtyn anyqtama usynýy kerek.
— Bul qujat oqýshynyń Shymkentte bilim alatynyn rastaý úshin qajet. Derekteri júıege bir ret engizilip, arhıvte saqtalady. Sondyqtan karta joǵalǵan jaǵdaıda anyqtamany qaıta tapsyrý talap etilmeıdi, — dedi ol.
Buǵan deıin Shymkentte qoǵamdyq kóliktiń jolaqysy qymbattaýy múmkin ekenin jazǵan edik.
