Shymkentke 3 óńirdiń polıtsııa qyzmetkerleri keldi
ShYMKENT. KAZINFORM — Shymkent kóshelerinde sońǵy kúnderi polıtsııa patrýlderiniń sany artqany baıqalady. Bul jaǵdaı áleýmettik jeli qoldanýshylary arasynda alańdaýshylyq týdyrdy.
Jelide taraǵan aqparatqa sáıkes, qala kóshelerinde polıtsııa ekıpajdary jıilegen. Keıbir jazbalarda kólik bazarlarynda júrgizýshilerdiń avtokólikke qajetti qural-jabdyqtardy jappaı satyp alyp jatqanyn kórýge bolady.
Polıtsııa departamentiniń málimetinshe, qalada 19-26 sáýir aralyǵynda «Qaýipsiz jol» jedel-profılaktıkalyq is-sharasy uıymdastyrylyp otyr. Osy maqsatta Shymkentke úsh óńirden — Qaraǵandy, Qyzylorda jáne Jambyl oblystarynan qosymsha polıtsııa kúshteri tartylǵan.
— Bul — quqyq buzýdyń aldyn alý tıimdiligin arttyrýǵa, sondaı-aq jol-kólik oqıǵalarynyń sanyn azaıtýǵa baǵyttalǵan keshendi shara. Mundaı tájirıbe elimizde keńinen qoldanylady jáne patrýldeý aýqymyn keńeıtip, quqyq buzýǵa jedel áreket etýge múmkindik beredi, — delingen qalalyq polıtsııa departamenti taratqan aqparatta.
Resmı málimetke sáıkes, is-sharanyń alǵashqy kúninde qala aýmaǵynda jol qozǵalysy erejelerin buzýdyń 1561 deregi tirkelgen. Onyń ishinde rólde otyryp uıaly telefon qoldanýdyń — 117, júrgizýshi kýáliginsiz kólik basqarýdyń — 18, mas kúıinde kólik basqarýdyń 3 deregi jáne basqa da quqyq buzýshylyqtar anyqtaldy.
— Reıdtik is-sharalar nátıjesinde 72 avtokólik aıyp turaǵyna qoıyldy. Tártip buzǵan júrgizýshilerge qatysty zańnamaǵa sáıkes tıisti ákimshilik sharalar qabyldandy, — dep habarlady polıtsııa ókilderi.
Budan buryn Shymkentte avtokortej jol erejesin óreskel buzǵanyn jazǵan edik.