Shymkent zoobaǵynyń qorshaýy nege batyp barady
ShYMKENT. KAZINFORM – Áleýmettik jelide Shymkent qalasyndaǵy haıýanattar baǵynyń qorshaýyna qatysty vıdeo tarady.
Turǵyndar jarııalaǵan beınejazbalardan jol jıegindegi trotýar deńgeıinen zoobaq qorshaýynyń tómen ornalasqany kórinedi. Beınejazba avtorlary nysannyń syrtqy aýmaǵy batyp bara jatqanyn aıtyp, alańdaýshylyq bildirgen.
Osyǵan qatysty Shymkent memlekettik zoologııalyq saıabaǵy resmı túsinik berdi.
Zoobaqtyń málimetinshe, jolaıryq qurylysy barysynda jer deńgeıiniń ózgerýine baılanysty syrtqy qorshaýdyń jekelegen bólikteriniń bıiktigi tómendep ketken.
– Qazirgi tańda jolaıryq qurylysyn júrgizip jatqan merdiger mekememen atalǵan másele boıynsha tıisti kelisim bar. Qorshaýdy qalpyna keltirý jáne bıiktetý boıynsha birneshe nusqa qarastyrylyp jatyr. Josparǵa sáıkes, qoldanystaǵy qorshaýdyń ústińgi bóligi qosymsha konstrýktsııalar arqyly bıiktetilip, qaýipsizdik talaptaryna sáıkestendiriledi. Sonymen qatar qorshaýdyń syrtqy kelbeti zoobaqtyń jalpy sáýlettik beınesine saı jasalady, – delingen vedomstvo habarlamasynda.
Zoobaq ákimshiligi tıisti jumystar jolaıryq qurylysy aıaqtalǵanǵa deıin júrgizilip, zoobaqtyń syrtqy qorshaýy qalpyna keltiriletinin málim etti.
Buǵan deıin zoobaq mańynda salynyp jatqan jolaıryqqa baılanysty turǵyndardyń kólik keptelisine shaǵymdanǵanyn jazǵan edik.
