Shymkent zoobaǵyndaǵy keriktiń basyndaǵy isik jurtty alańdatty
ASTANA. KAZINFORM – Áleýmettik jelide Shymkent zoobaǵyndaǵy keriktiń vıdeosy taralyp, turǵyndardyń alańdaýshylyǵyn týǵyzdy. Janýardyń basyndaǵy tompaq pen tar kórinetin jabyq qoraǵa qatysty zoobaq ákimshiligi túsinikteme berdi.
Instagram jelisinde jarııalanǵan vıdeoda keriktiń jabyq pavılonda turǵany kórinedi. Jeli qoldanýshylary onyń basyndaǵy tompaqty aýrýdyń nemese jaraqattyń belgisi bolýy múmkin dep boljap, janýardyń jaǵdaıyn tekserýdi talap etti.
Keıbir turǵyndar kerikke arnalǵan orynnyń tarlyǵyn synǵa alyp, zoobaqtaǵy janýarlardy kútip-baǵý jaǵdaıyna nazar aýdarýdy surady.
– Oǵan ne bolǵan? Basyndaǵy tompaqtar men jaralar qaıdan shyqqan? Mal dárigeri qaıda qarap otyr? Janýarlarǵa tıisti kútim jasalmaıtyn, jetkilikti aýmaǵy joq mundaı zoobaqtardy jabý kerek. Bul naǵyz janýardy qorlaý! Oǵan ol jerde oryn tym tar. Zoobaqty tekserýdi talap etemiz, – dep jazdy áleýmettik jeli qoldanýshylary.
Shymkent zoobaǵynyń ákimshiligi keriktiń basyndaǵy tompaq aýrý nemese jaraqat emes, atalyq kerikterge tán tabıǵı anatomııalyq erekshelik ekenin túsindirdi.
Mamandardyń aıtýynsha, janýardyń jasy ulǵaıǵan saıyn bas súıegindegi súıekti ósindiler aıqynyraq kórine bastaıdy. Tabıǵatta atalyq kerikter analyqtar men aýmaq úshin talasqanda uzyn moıyndaryn sermep, bastarymen soqqy jasaıdy. Al súıekti ósindiler bas súıegin qorǵap, soqqynyń kúshin arttyrýǵa kómektesedi.
– Keriktiń mańdaıyndaǵy dóńes bólik – atalyqtaryna tán tabıǵı anatomııalyq erekshelik. Janýardyń jasy ulǵaıǵan saıyn bas súıegindegi súıekti ósindiler aıqynyraq kórinýi múmkin. Bul jaraqat emes, aǵzanyń tabıǵı fızıologııalyq damýynyń bir bóligi. Atalǵan erekshelik qorǵanysh qyzmetin atqarady jáne tabıǵı ortada atalyq kerikterdiń ózara kúresinde ózindik qural retinde paıdalanylady, – dep túsindirdi zoobaq ákimshiligi.
Sondaı-aq zoobaq qyzmetkerleri kerikterdiń keıde bastaryn qorshaýǵa nemese aǵashtarǵa úıkeıtinin aıtty. Sonyń saldarynan múıizderiniń ushyndaǵy jún túsip, terisi ashylyp qalýy múmkin. Syrttaı qaraǵanda bul jaraqatqa uqsaıdy.
Al jabyq qoranyń kólemine qatysty synǵa ákimshilik janýarlardy qysta kútip-baǵý tártibimen jaýap berdi.
– Qys mezgilinde qolaısyz aýa raıy men tómen temperatýraǵa baılanysty kerikter ashyq alańǵa shyǵarylmaıdy. Bul ýaqytta olar arnaıy jabdyqtalǵan, jylytylatyn qysqy pavılonda ustalady. Mundaı shara janýarlardyń densaýlyǵyn saqtaýǵa, sýyqtan qorǵaýǵa jáne qolaıly jaǵdaı jasaýǵa baǵyttalǵan. Ashyq aýmaqqa shyǵarý múmkindigi aýa raıy men aýa temperatýrasyna qaraı retteledi, – dep habarlady zoobaq ákimshiligi.
Zoobaq málimetinshe, qyzmetkerler kerikterdiń minez-qulqyn, qorektenýin jáne jalpy jaǵdaıyn kún saıyn baqylap otyrady. Qajet bolǵan jaǵdaıda veterınar mamandar janýarlardy tekseredi.
Aıta keteıik, buǵan deıin Almaty zoobaǵyndaǵy Pýrga esimdi aq aıýdyń jaǵdaıy da turǵyndardy alańdatqan bolatyn. Zoobaq ákimshiligi janýardyń densaýlyǵy qalypty ekenin jáne onyń turaqty veterınarııalyq baqylaýda ekenin málimdegen edi.
