Shymkent zoobaǵynda túıequsty tepken er adam izdestirilip jatyr
ShYMKENT. KAZINFORM-Oqıǵany ózge kelýshiler beınejazbaǵa túsirip, áleýmettik jelige júktegen.
Shymkent qalalyq zoobaǵynda er adam qaýipsizdik talaptaryn elemeı, qorshaýdan asyp túsken. \Ol túıequsty teýip qana qoımaı, basqa da janýarlardy ádeıi qorqyta bastaǵan. Bul áreket zoobaq qyzmetkerleriniń de, qala turǵyndarynyń da ashý-yzasyn týǵyzdy.
— Janýarlar — oıynshyq emes, olar da aýyrsyný men qorqynyshty sezine alady. Mundaı áreket adamgershilikke jat. Janýarlarǵa qurmetpen qaraý — árbir azamattyń boryshy, — dedi zoobaq ókilderi.
Zoobaq ákimshiligi quqyq buzýshyny anyqtaýǵa qoǵam belsendilerinen kómek surap otyr.
— Eger bul azamatty tanysańyz, bizge habarlasyńyz. Aqparat mindetti túrde quqyq qorǵaý organdaryna joldanady, — delingen resmı habarlamada.
Shymkent qalalyq polıtsııa departamenti bul derekke baılanysty tekserý jumystary bastalǵanyn rastady. Qazirgi tańda quqyq buzýshyny anyqtap, ony zań aıasynda jaýapqa tartý máselesi qaralyp jatyr.
Aıta keteıik, budan buryn Shymkenttegi Kongress-holl keshenine «Qyzǵaldaq» dep ataý berilgenin jazǵan bolatynbyz.