Shymkent-Jıdda jańa tikeleı reısi iske qosylatyn boldy
ASTANA. KAZINFORM - Air Astana 10 qyrkúıekten bastap seısenbi men juma kúnderi Airbus A320 áýe kemesimen oryndalatyn Shymkent-Jıdda jańa tikeleı reısine bıletterdi sata bastady.
KS 235 reısi Shymkentten Jıddaǵa 09.30-da ushyp shyǵyp, Jıddaǵa 13.05-te ushyp keledi. KS 236 reısi Jıddadan Shymkentke 15.35-te ushyp shyǵady, Shymkentke saǵat 23.00-de jetedi. Munda áýejaılardyń jergilikti ýaqyty kórsetilgen. Ushý uzaqtyǵy - 5 saǵat 35 mınýt.
Ekonom-klastaǵy baryp-qaıtý bıletteriniń eń tómengi quny alymdardyń barlyǵyn qosqanda 384 600 teńge, bıznes-klasta - 864 309 teńge.
Esterińizge salaıyq, Jıddaǵa reıster Almatydan da beısenbi jáne jeksenbi kúnderi oryndalady.
Sonymen qatar, Astana áýejaıynyń túngi ýaqytta jabylýyna baılanysty, Air Astana 8 tamyzdan bastap Almaty-Qaraǵandy tikeleı reısin iske qosady. Reıs elordalyq áýejaıda jóndeý jumystary aıaqtalǵanǵa deıin beısenbi, juma jáne senbi kúnderi oryndalady.
KS 311 reısi Almatydan Qaraǵandyǵa 21.20-da ushyp shyǵp, Qaraǵandyǵa 22.50-de keledi. KS 312 keri reısi Qaraǵandydan Almatyǵa 23.50-de ushady jáne Almatyǵa 01.20-da keledi. Ushý uzaqtyǵy - 1 saǵat 30 mınýt. Ekonom-klastaǵy alymdarmen birge baryp-qaıtý bıletteriniń eń tómengi quny 35 179 teńge, bıznes-klasta - 104 529 teńge.
