Shymkent UQKD eks-ofıtseri Manat Sarbasov 12 jylǵa sottaldy
ShYMKENT.KAZINFORM - Shymkent qylmystyq ister jónindegi mamandandyrylǵan aýdanaralyq sotynda alqabıler Shymkent UQKD bastyǵynyń burynǵy birinshi orynbasary Manat Sarbasovqa qatysty úkim shyǵardy. Іs boıynsha úkimdi sýdıa Abınýr Qarabaev oqydy, dep habarlaıdy Kazinform agenttiginiń tilshisi.
Manat Sarbasov 12 jylǵa sottaldy, ol jazasyn qaýipsizdigi ortasha mekemede óteıdi. Sonymen qatar UQK podpolkovnıgi ataǵynan aıyryldy. Sonymen birge eki bólmeli páter men Toyota Land Cruiser avtokóligi tárkilenýge jatady. Sondaı-aq para mólsherin óteýi kerek – 70 mln teńge.
Temirhan Varzılovqa 4 jylǵa bas bostandyǵyn shekteý úkimi shyǵaryldy.
Shyńǵys Jańabaev 7 jylǵa bas bostandyǵynan aıyryldy.
Erlan Tyshqanbaev 5 jylǵa bas bostandyǵy shektelip, sot zalynan bosatyldy.
Aıdos Sraılov QR QK-niń 304-baby boıynsha kináli dep tanylyp, bir jylǵa bas bostandyǵyn shekteýge úkim shyǵaryldy, oǵan qoldanystaǵy raqymshylyq jasaldy.
Aıta keteıik, prokýror Shymkent UQKD bastyǵynyń burynǵy birinshi orynbasary Manat Sarbasovqa 12 jyl bas bostandyǵynan aıyrýdy surady.
Sondaı-aq, bes adam – Shymkent Densaýlyq saqtaý basqarmasynyń burynǵy basshysy Temirhan Varzılov, onyń qaramaǵyndaǵy Shyńǵys Jańabaev, kásipker Erlan Tyshqanbaev, UQKD maıory Aıdos Sraılov jáne Sarbasovtyń ózi sottalýshylar otyrysyna qatysty.
Tergeý málimeti boıynsha, 2019-2020 jyldary Sarbasov Elmıra Dúısenqyzynan kolledjge «qamqorshylyq» jasaǵany úshin 45 mln teńge, al jekemenshik mektepke járdemdeskeni úshin taǵy 70 mln teńge alǵan.
Aıyptaý málimetteri boıynsha, ol bul aqshaǵa Shymkentten eki páter men avtokólik satyp alǵan. Sodan keıin onyń bireýin jóndep, úsh ese qymbatqa satqan.
Prokýror Densaýlyq saqtaý basqarmasynyń burynǵy basshysy Temirhan Varzılov, Shyńǵys Jańabaev jáne kásipker Erlan Tyshqanbaevty medıtsınalyq jabdyqtardy jetkizý jáne medıtsınalyq maskalardy joǵary baǵamen satyp alý kezinde asa iri mólsherde bıýdjet qarajatyn urlaǵany úshin kináli dep tanýdy surady.
Aıyptaýdy baǵalaý boıynsha jalpy shyǵyn 130 mln teńgeden asty.
Prokýror Varzılov pen Jańabaevty 8 jyl, Tyshqanbaevty 7 jyl bas bostandyǵynan aıyrýdy surady.
Aıdos Sraılovty tek zańsyz kásipkerlik qyzmeti úshin kináli dep taýyp, raqymshylyq jasaý boıynsha jaýapkershilikten bosatýdy usyndy.
Aıta keteıik, elimizde Sybaılas jemqorlyqqa qarsy jańa standart bekitildi.