Shymkent turǵynynyń úıinde qarbyz arasynda jasyrylǵan esirtki plantatsııasy anyqtaldy
ASTANA. KAZINFORM – Іshki ister mınıstrligi esirtkiniń zańsyz aınalymyna qarsy is-qımyl boıynsha jumysty jalǵastyryp jatyr, - dep jazdy Polisia.kz.
«Qarasora – 2026» jedel-profılaktıkalyq is-sharasy aıasynda kannabıs tobyndaǵy esirtkilerdi daıyndaýdyń taǵy bir faktisi anyqtaldy.
- Esirtki qylmysyna qarsy kúres bólinisiniń qyzmetkerleri Shymkent qalasy turǵynynyń qylmystyq áreketin toqtatty. Ol óz úıiniń aýmaǵynda «gashısh» pen «marıhýana» sekildi kannabıs tobyndaǵy esirtkini ósirýden bastap daıyn ónimdi satý úshin daıyndaý protsesine deıin uıymdastyrǵan. Tintý barysynda aýyl sharýashylyǵy daqyldarynyń arasynda jasyrylǵan quramynda esirtkisi bar shamamen 130 túp ósimdik tabyldy. Sondaı-aq sharýashylyq qurylystarynan 330 keliden astam esirtki shıkizaty jáne ári qaraı satý úshin býyp oralǵan daıyn ónim tárkilendi. Atalǵan fakti boıynsha Qylmystyq kodekstiń eki baby - esirtkini ótkizý maqsatynda saqtaý jáne quramynda esirtkisi bar ósimdikterdi ósirý boıynsha qylmystyq is qozǵaldy. Sotqa deıingi tergeý sheńberinde qylmystyq árekettiń barlyq mán-jaıy, yqtımal ótkizý arnalary jáne zańsyz syzbaǵa qatysy bar basqa da kúdiktiler anyqtalyp jatyr, - dedi ІІM esirtki qylmysyna qarsy is-qımyl komıteti tóraǵasynyń orynbasary Eldar Ábdikenov.
ІІM esirtkini zańsyz ósirý, óndirý jáne taratý faktilerin anyqtaý jáne jolyn kesý boıynsha jumystar jalǵasatynyn atap ótti.
Aıta keteıik, Qyzylordada esirtki ósirgen 21 adam ustaldy.
Esirtkiden túsken 2,6 mlrd teńge zańsyz kiriske tosqaýyl qoıyldy.
