Shymkent turǵyny sapasyz onlaın-kýrsqa tólegen aqshasyn qaıtaryp aldy

ShYMKENT. KAZINFORM – Shymkent turǵyny 195 myń teńgege onlaın-kýrs satyp alǵannan keıin, onyń sapasy kásibı deńgeıge saı kelmegendikten óz quqyǵyn qorǵady. Bul týraly qalalyq saýda jáne tutynýshylardyń quqyqtaryn qorǵaý departamenti habarlady.

Turǵynnyń aıtýynsha, kýrstyń mazmuny ústirt bolǵan. Vıdeosabaqtardyń kópshiligi 20-30 mınýtqa ǵana sozylyp, materıaldy jetkilikti tereń ári júıeli túsindirýge múmkindik bermegen. Ár taqyryp bir ǵana mysalmen shektelgen, balama tásilder men tolyq taldaý bolmaǵan.

Montajǵa arnalǵan bólimde kásibı túsiniktemeler, baǵdarlamalardy tańdaý, montaj logıkasy jáne sahna qurý qaǵıdalary jóninde aqparat berilmegen. Keıbir modýlderde avtor bilim berý ornyna jeke oqıǵalar aıtyp, kezdeısoq kadrlar kórsetken. Jalpy, materıal kásibı oqytý formatyna emes, TikTok nemese Instagram beınejazbalaryna uqsas bolǵan.

Paıdalanýshy máseleni uıymmen sheshýge tyrysqanymen, eki kún ishinde ýáde etilgen jazbasha jaýap bolmaǵan. Qaıta habarlasqanda kompanııa ókili daýlasyp, kýrstyń qoljetimdiligi berilgenin alǵa tartyp, aqshany qaıtarýdan bas tartqan.

Osydan keıin azamat Shymkent qalasy boıynsha Saýda jáne tutynýshylardyń quqyqtaryn qorǵaý departamentine júgindi. Nátıjesinde tıisti jumys júrgizilip, oryndaýshyǵa túsinikteme berilip, tutynýshynyń quqyǵy zańda belgilengen tártippen qorǵaldy.

Departament onlaın-qyzmetterdi satyp alǵanda tutynýshynyń kórsetilgen sıpattamaǵa saı sapaly ónim alýǵa quqyǵy bar ekenin eske salady. Qyzmet sapasyz bolǵan jaǵdaıda tutynýshy quqyǵyn qorǵaý úshin tıisti organdarǵa júgine alady.

Aıta keteıik, Shymkentte 13 kásiporyn 90 qyzmetkerge 133 mln teńgeden astam jalaqy qaryz.