Shymkent turǵyndarynyń 99 paıyzy kommýnaldyq qyzmetpen qamtamasyz etildi
ASTANA. KAZINFORM — Shymkent qalasynyń ákimi Ǵabıt Syzdyqbekov Ortalyq kommýnıkatsııalar qyzmetinde ótken baspasóz konferentsııasynda qaladaǵy ınjenerlik ınfraqurylymnyń jańartylýy men turǵyndardy kommýnaldyq qyzmettermen qamtamasyz etý máselelerin baıandady.
— Bıyl Qyzyljar-2, Aqjaıyq, Turan shaǵyn aýdandarynda 11 myńǵa jýyq turǵyn taza aýyz sýmen qamtyldy. Demeýshiler esebinen Tekesý jáne Aıkól eldi mekenderine tartylǵan 32 shaqyrym sý qubyry arqyly ortalyqtandyrylǵan aýyz sý júıesine qosyldyq, — dedi ákim.
Sondaı-aq Qyzyljar-2, Aqjaıyq, Azat, Turan jáne Qursaı aýdandaryndaǵy 13 myńǵa jýyq turǵyn sapaly elektr energııasyn paıdalanyp otyr. 2019 jyldan beri qurylys jumystary sozylǵan «Aqjar» qosalqy stantsııasy paıdalanýǵa berildi.
— Óńirdegi elektr energııasy tapshylyǵyn azaıtý maqsatynda «Qazyǵurt» qosalqy stantsııasynyń qýattylyǵyn arttyrdyq, 40 myńǵa jýyq turǵyn men óndiris oryndaryn úzdiksiz elektr energııasymen qamtamasyz etýge múmkindik jasaldy, — dedi Ǵabıt Syzdyqbekov.
Gazben qamtý da kúsheıtilgen. Atap aıtqanda Juldyz, Jalyn, Qarabastaý, Qyzyljar-2, Dostyq, Altyntóbe, Tassaı jáne Turan aýdandarynda 25 myńǵa jýyq turǵyn tabıǵı gazben qamtamasyz etildi.
— Gaz júıelerindegi aqaýlardy anyqtaıtyn «Pergam» jyljymaly qondyrǵysy arqyly 107 shaqyrym qubyrdan 67 aqaý túzetildi, — dedi qala ákimi.
Nátıjesinde, qala turǵyndarynyń 99,9 paıyzy aýyz sýmen, 100 paıyzy elektr energııasymen jáne 98 paıyzy tabıǵı gazben qamtyldy.
Sonymen qatar qala ákiminiń aıtýynsha, ınvestıtsııalardy tartý jáne óndiris oryndaryn damytý úshin ınjenerlik júıelerdiń qýattylyǵyn arttyrý qajet.
— Prezıdentimizdiń «Energetıkalyq jáne kommýnaldyq sektorlardy jańǵyrtý» ulttyq jobasy aıasynda «Ońtústik Jaryq Tranzıt» kompanııasy esebinen 26 mlrd teńgege «Qyzylsý» qosalqy stantsııasyn salý josparlanyp otyr, — dedi Ǵabıt Syzdyqbekov.
Turǵyndarǵa qolaıly orta qurýmen birge, qala qaýipsizdigi úshin túngi jaryqtandyrý da mańyzdy. 2023 jylǵa deıin qaladaǵy 6 714 kósheniń 2 028 kóshe jaryqtandyrylǵan, al sońǵy eki jylda bul kórsetkish 40 esege ulǵaıyp, 4 686 kóshe jaryqtandyryldy.
— Jyl sońyna deıin qala kósheleri tolyq — 100 paıyz — jaryqtandyrylatyn bolady, — dep habarlady qala ákimi.
Buǵan deıin Shardara sý qoımasynda sý deńgeıiniń tómendeýinen qalada aýyz sý tapshylyǵy týyndaǵanyn jazǵanbyz.