Shymkent turǵyndary Qoshqarata ózeni sýynyń lastanýyna alańdaýly
ShYMKENT. KAZINFORM – Áleýmettik jelide Shymkent turǵyndary úshin qasıetti sanalatyn Qoshqarata ózeni sýynyń lastanǵany týraly vıdeo tarady.
Rolık avtory ózendi jaqyn mańda ornalasqan saýda oıyn-saýyq ortalyǵy lastaýy múmkin dep kúdik keltirip otyr.
Shymkent Plaza saýda oıyn-saýyq ortalyǵynyń ákimshiligi ózine taǵylǵan aıyppen kelispeıdi. Olar ózderinen shyǵatyn sýdyń ortalyqtandyrylǵan qalalyq káriz jelisine jiberiletinin aıtady.
-Biz halyqtyń alańdaýshylyǵyn jaqsy túsinip otyrmyz. Alaıda biz qoldanatyn sý arnaıy qurylǵylardyń kómegimen tazartylady. Sondaı-aq «Shymkent Plaza» saýda oıyn-saýyq ortalyǵynan shyǵatyn sharýashylyq, óndiristik maqsattaǵy sýdyń tek qalalyq ortalyqtandyrylǵan káriz júıesine ǵana jiberiletinin málimdeımiz. Sol sebepti bizdiń taraptan las sýdy Qoshqarat ózenine jiberip jatyr degen aqparat shyndyqqa sáıkespeıdi,-dep málimdedi «Shymkent Plaza» ortalyǵynyń ókilderi.
Qalalyq ortany damytý basqarmasy máseleniń baqylaýǵa alynyp, tıisti sharalar qoldanylatynyn aıtty. Al ekologııa departamentiniń ókilderi mamandar oqıǵa ornyna barǵan kezde qubyrdan ózenge sý jiberý faktisi anyqtalmaǵanyn aıtty.
- Eger resmı shaǵym túsetin bolsa, kezekten tys tekserý taǵaıyndalady,-deıdi vedomstvo ókilderi.
Buǵan qosa sanıtarlyq-epıdemıologııalyq baqylaý basqarmasynyń ókilderi arnaıy tekserý júrgizilgenin aıtty.
- Ál-Farabı aýdany ákimdigi, Shymkent qalalyq ekologııa departamenti jáne sanıtarlyq-epıdemıologııalyq baqylaý departamentiniń ókilderi birlesip, arnaıy tekserý júrgizip, qubyr arqyly Qoshqarata ózenine eshqandaı da sý jiberilmegenin aıtyp otyr. Soǵan qaramastan bul másele quzyrly organdardyń baqylaýynda bolady,-dep naqtylady basqarma mamandary.
Jalpy, bul Qoshqarata ózenine las sýdyń aralasyp jatqany jóninde áleýmettik jelige taraǵan alǵashqy habar emes. Osyǵan deıin turǵyndar sýdyń qyzyl túske boıalǵany týraly habarlaǵan.
Osyǵan deıin Shymkent qalasynyń áleýmettik-ekonomıkalyq damý qarqyny týraly jazǵan edik.