Shymkent turǵyndary ınternet-alaıaqtarǵa 720 mln teńge berip qoıǵan

Shymkentte ınternet alaıaqtaryna aldanyp qalǵandar kóp. Bul týraly Shymkent qalasy polıtsııa departamenti bastyǵynyń orynbasary Arman Beısenbaev málimdedi, dep habarlaıdy Kazinform.

Shymkentte jyl basynan beri 786 ınternet-alaıaqtyq qylmysy tirkelgen. Jergilikti turǵyndarǵa keltirilgen shyǵyn kólemi jalpy 720 mln teńgeni quraıdy.

«Azamattarǵa ınternet-alaıaqtyqqa qarsy túsindirme jumystary júrgizilgenine qaramastan, atalǵan qylmys sany azaıar emes. Osyǵan baılanysty turǵyndarǵa alaıaqtyqtan saq bolýdy eskertemiz», – dedi polıtsııa polkovnıgi Arman Beısenbaev.

Tártip saqshysynyń aıtýynsha, ınternet-alaıaqtar aram oıyn iske asyrý úshin myna ádis-tásilderdi keńinen qoldanady:

• Olar ózderin «bank qyzmetkeri» nemese «quqyq qorǵaý organdarynyń ókili» retinde tanystyrady. Jalǵan nómirlermen qońyraý shalyp, sizdiń esepshotyńyzdaǵy aqshalardy shuǵyl basqa shotqa aýdartýǵa nemese atyńyzdan nesıe rásimdeýge tyrysady.
• Al keıbireýleri ınternettiń múmkindigin eskere otyryp, laýazymdy tulǵalardyń atyn paıdalanyp, elimizdegi iri kásiporyndarǵa ınvestıtsııa salý arqyly aqshańyzdy kóbeıtýge shaqyrady.
• Alaıaqtardyń eń jıi qoldanatyn taǵy bir ádisi – taýarlaı nesıeni qolma-qol aqshaǵa aıyrbastap berýge sendiredi, (obnalıchka jasaıdy) túbinde sizdi taqyrǵa otyǵyzyp ketedi.
• Tórtinshiden, qazirgi tańda keń taraǵan ınternet-alaıaqtyq habarlandyrý saıttary arqyly, ıaǵnı «OLH», «Krisha», «Kolesa» platformalarynda jasalady. Onda, túrli múlikterdi satylymǵa shyǵaryp, adamdardy tartý úshin arzan baǵada sapaly taýarlardy usynady. Sondaı-aq, qyzyǵýshylyq tanytqan azamattardy sheshim qabyldaýǵa asyqtyryp, aldyn ala tólem jasaýǵa kóndiredi.
• Taǵy bir aıta ketetin jaıt, óz atyńyzǵa ashylǵan bank kartalaryn bóten azamattarǵa satpańyzdar jáne jalǵa bermeńizder. Olar ony teris pıǵylyn júzege asyrý úshin paıdalanady. Al bul jaǵdaıda zań aldynda sizge de, qylmyskerge de qatań jaza qarastyrylǵan.