Shymkent túlekterine syılyq berý, anımator men kortej jaldaýǵa tyıym salyndy
ShYMKENT. KAZINFORM. — Shymkentte oqý jylynyń aıaqtalýy qarsańynda polıtsııa men beıindi vedomstvolar kúsheıtilgen jumys rejımine kóshti.
Jańa baqylaý sharalary balalardyń qaýipsizdigin qamtamasyz etý, qoǵamdyq tártiptiń buzylýyn qadaǵalaý jáne ata-analardan zańsyz aqsha jınaýdy boldyrmaýdy kózdeıdi.
Bıyl Shymkent mektepterin 40 myńnan astam túlek bitiredi. Negizgi orta bilimdi 24 174 toǵyzynshy synyp oqýshylary aıaqtaıdy. Al 16 032 on birinshi synyp bitirýshileri jalpy orta bilim týraly attestat alýǵa daıyndalyp jatyr. Oqý jyly resmı túrde 25 mamyrda aıaqtalady. Bul kúni elimizdiń barlyq mektepterinde «Bilimim — Otanyma!» atty biryńǵaı synyp saǵaty ótkiziledi.
Saltanatty jıyn men attestat tapsyrý rásimin tek mektep aýmaǵynda ótkizýge ruqsat berildi. Shymkentte merekelik sharalardy mektepten tys jerde ótkizýge qatań tyıym salynady.
Bilim basqarmasy mekteppen qoshtasý sáti eshqandaı sán-saltanatsyz, belgilengen talaptardy buzbaı ótýi tıis dep eskertti. Sondaı-aq, aqsha jınaýǵa tyıymmen birge kommertsııalyq oıyn-saýyq atrıbýttaryn paıdalaný quqyǵy da shekteldi.
— Bitirý keshine anımatorlardy, merekelik agenttikterdi nemese jeke stýdııalardy tartýǵa úzildi-kesildi tyıym salyndy. Dastarqan jaıýdy uıymdastyrýǵa jáne mektep ákimshiligi men pedagogterge syılyqtar úshin aqsha jınaýǵa jol berilmeıdi. Oqýshylardyń syrt kelbeti mektep formasyna qatań sáıkes kelýi tıis, bul rette shamadan tys árlený men tym qymbat kıimder satyp alýǵa shekteý qoıylady, — dep habarlady qalalyq bilim basqarmasy basshysynyń orynbasary Gúlnár Dáribaeva.
Sonymen qatar, qalalyq polıtsııa departamenti de qaýipsizdik sharalaryn kúsheıtip jatyr. Quqyq qorǵaý organdary avtokortejderdi, túlekterdiń qala syrtyna shyǵýy men jol qozǵalysy erejelerin buzý áreketteriniń aldyn alýdy josparlap otyr.
Quqyq qorǵaý organdary sońǵy qońyraý kúni arnaıy tekseriske ár mektepke eki qyzmetkerden bekitiletinin túsindirdi. Oǵan qosa birneshe bilim berý mekemesine vedomstvonyń basshy ókilderi qosymsha jetekshilik etetin bolady.
— Jalǵa alynǵan avtokóliktermen qala kóshelerinde, sondaı-aq qala syrtyndaǵy sý aıdyndary men demalys aımaqtaryna jappaı shyǵýyn boldyrmaý úshin megapolıske kireberis pen shyǵaberisinde, saıabaqtarda jáne jastar kóp jınalatyn oryndarda arnaıy beketter qoıylady. Jedel basqarý ortalyǵynyń beınebaqylaýy arqyly táýlik boıy qala kóshelerindegi jaǵdaıdy baqylaý júzege asady. Bizdiń mindetimiz — mereke kúnderi jastar arasyndaǵy quqyqbuzýshylyq pen jaraqattaný jaǵdaılaryna jol bermeý, — dep atap ótti Shymkent qalasy Polıtsııa departamenti Qoǵamdyq qaýipsizdik basqarmasy bastyǵynyń orynbasary Danabaı Álıev.
Kóshelerdi patrýldeýmen qatar, polıtseıler mektep ákimshiligimen birlese otyryp, kámeletke tolmaǵandardyń túngi ýaqytta oıyn-saýyq oryndary men qoǵamdyq jerlerde júrýine jol bermeý úshin ata-analar jınalysyn ótkizedi jáne kezekshilik uıymdastyrady.
Eske sala keteıik, buǵan deıin bıyl QR Oqý-aǵartý mınıstrligi mektep bitirý keshterine jalpyǵa ortaq tártip engizgenin jazdyq.
Aıaýlym Qanatqyzy
