Shymkent prokýratýrasynyń narazylyǵymen memleketke 263 mln teńge qarjy qaıtaryldy

ShYMKENT. KAZINFORM — Joǵarǵy sot prokýrordyń memleketke 263 mln teńgeden astam aqshany qaıtarý týraly kassatsııalyq ótinishhatyn qanaǵattandyrdy.

Shymkent qalasynyń MAÁS sheshimimen «Temir-Metall optom» JShS-nyń salyqtyq tekserý aktisin jáne tekserý nátıjesi týraly habarlamany joıý týraly ákimshilik talaby qanaǵattandyrýdan bas tartylǵan.

«Memlekettik kirister departamenti salyqtardy jáne bıýdjetke tólenetin basqa da mindetti tólemderdi durys esepteý jáne ýaqtyly tóleý máselesi boıynsha JShS qatysty salyqtyq qujattamalyq tekserý taǵaıyndaǵan. Tekserý qorytyndysy boıynsha habarlama berilip, oǵan sáıkes qosymsha 263 mln teńge eseptelgen.

Departamenttiń habarlamasy JShS resmı qujat aınalymy arqyly senimsiz jetkizýshilermen mámileler boıynsha shyǵystary salyq salynatyn tabystan shegerimge jatqyzylatyndyǵyna negizdelgen. JShS bul sot sheshimimen kelispeı, apellıatsııalyq sotqa shaǵym túsirgen», dep jazdy baqylaýshy organnan.

Shymkent qalalyq sotynyń ákimshilik ister jónindegi sot alqasynyń qaýlysymen talap qoıýdy qanaǵattandyrý týraly jańa sheshim shyǵaryla otyryp, birinshi satydaǵy sot sheshiminiń kúshi joıylǵan.

Apellıatsııalyq satydaǵy sottyń materıaldyq quqyq normalaryn durys qoldanbaýyna baılanysty qala prokýratýrasy kassatsııalyq ótinishhat engizip, memlekettiń múddesin qorǵady.