Shymkent prokýratýrasy «Ordabasynyń» burynǵy basshylyǵyna qatysty qylmystyq is qozǵady

ShYMKENT. KAZINFORM – 2023–2024 jyldary «Ordabasy» fýtbol klýby 18 oıynshymen jalpy somasy 2,3 mıllıard teńgeden asatyn kelisimshart jasasqan. Onyń 1,9 mıllıard teńgesi bir jyldyń ishinde sheteldik legıonerlerge tólengen.

Qalalyq prokýratýranyń málimetinshe, klýbtyń burynǵy basshylyǵynyń áreketteri laýazymdy ókilettigin teris paıdalaný týraly kúdik týdyrǵan.

– Bul qarajat ne úshin tólendi, kim bóldi jáne kimge bóldi, qarajat qaıda jumsaldy — osy suraqtardyń barlyǵyna jaýap berilýi kerek. Qylmystyq is qozǵalýyna baılanysty jan-jaqty tekserý júrgizilip jatyr. Bonýstardy zańsyz esepteý faktisi rastaldy. Tekserýdi tikeleı prokýratýra júrgizdi jáne anyqtalǵan quqyqbuzýshylyqtar negizinde qylmystyq is qozǵaý týraly sheshim qabyldandy, - dep habarlady qalalyq prokýratýra.

Bul jaǵdaı qoǵamda keńinen talqylanyp, úlken rezonans týdyrdy. Buǵan Shymkent qalasynyń ákimi Ǵabıt Syzdyqbekovtiń klýbtyń shamadan tys qarjylyq mindettemeleri týraly málimdemesi sebep boldy. Ásirese, ulttyq quramanyń kapıtany Ashat Taǵybergen kópshiliktiń qyzý talqysyna tústi. Onyń aı saıynǵy jalaqysy 20 mıllıon teńgeni quraǵan. 2025 jyldyń aqpan aıynda onymen jasalǵan kelisimshart ózara kelisim negizinde merziminen buryn buzyldy. Kelisimshartta birjaqty buzý jaǵdaıynda aıyppul qarastyrylǵanyna qaramastan, taraptar bir-birine qarjylyq talap qoımaǵan. Bul týraly qalalyq sport basqarmasynyń burynǵy basshysy Maratbek Myqtybekov habarlady.

– Ashat Taǵybergen eshqandaı aıyppul tólemedi. Kelisimshart ózara kelisim boıynsha buzyldy. Meniń basshylyq etý kezeńimde klýbta tekserý júrgizildi, bul jasyryn bolmady. FIFA qorǵaýyndaǵy kelisimshartqa qol qoıǵan barlyq oıynshy Halyqaralyq fýtbol federatsııasynyń baqylaýynda boldy. Al bonýs máselesine kelsek, bul suraqtardyń barlyǵy tikeleı QFF men onyń basshylyǵy arqyly sheshildi, - dep túsinikteme berdi Maratbek Myqtybekov.

Qazir atalǵan is boıynsha tergeý jalǵasyp jatyr. Eger bıýdjet pen demeýshiler qarjysynyń negizsiz jumsalǵany nemese jymqyrylǵany anyqtalsa, burynǵy laýazymdy tulǵalar qylmystyq jaýapkershilikke tartylýy múmkin. 

Aıta keteıik, budan buryn Shymkentte psıhıkalyq ortalyqta emdelýshilerdi zorlaǵandar 15 jylǵa sottalǵanyn jazǵan bolatynbyz.