Shymkenttiń polıtsııa bastyǵy jáne onyń orynbasary qyzmetinen ketti

ASTANA. KAZINFORM — Іshki ister mınıstrligi Shymkent polıtsııa departamentinde kadrlyq sheshimder qabyldanǵanyn málim etti. Bul sheshimder 21 jastaǵy stýdent Nuraı Serikbaıdyń óliminen keıin qabyldandy.

ІІM Ózindik qaýipsizdik departamenti Qarataý aýdany polıtsııa basqarmasynyń qyzmetkerleriniń marqum qyzdyń týystarynyń ótinishterin tıisinshe qaramaýdyń yqtımal faktisi boıynsha sotqa deıingi tergeý júrgizilip jatyr.

Qylmystyq is sheńberinde jedel den qoımaý jáne ýaqtyly sharalar qabyldamaý boıynsha barlyq dáıekter jan-jaqty tekseriletin bolady.

— Tergeý qorytyndysy boıynsha zańda belgilengen tártippen laýazymdy tulǵalardyń áreketine quqyqtyq baǵa beriledi. Sonymen qatar qyzmettik tergeý júrgizilip, onyń nátıjesi boıynsha basqarýshylyq jaýapkershilik negizinde tártiptik sharalar qabyldandy. Quqyqtyq tártipti tıisinshe qamtamasyz etpegeni úshin Shymkent qalasy polıtsııa departamentiniń bastyǵy jáne onyń birinshi orynbasary atqaratyn laýazymdarynan bosatylyp, birqatar laýazymdy tulǵalar ishki ister organdarynan qyzmetten shyǵaryldy, — delingen vedomstvo habarlamasynda.

ІІM zańdy buzýǵa yqpal etetin kez kelgen faktilerge, sondaı-aq zorlyq-zombylyq pen qatygezdik kórinisterine qatysty nyq prıntsıpti ustanady.

Mınıstrlik málim etkendeı, kisi óltirý faktisi boıynsha qylmystyq isti tergeý barysy ІІM baqylaýynda. Tájirıbeli qyzmetkerler qatarynan arnaıy jedel-tergeý toby quryldy.

Aıta keteıik, 11 qańtar kúni Shymkentte kópqabatty úıdiń mańynan 21 jastaǵy qyzdyń máıiti tabyldy.

Keıinnen marqum Nuraı Serikbaıdyń ólimine kúdikti retinde 28 jastaǵy Shymkent qalasynyń turǵyny ustalyp, ýaqytsha ustaý ızolıatoryna qamaldy.

Búgin Prezıdent Shymkenttegi boıjetkenniń ólimine qatysty Bas prokýratýraǵa tapsyrma berdi.