Shymkent polıtseıleri balalar úıi tárbıelenýshisiniń armanyn oryndady

Shymkent polıtseıleri balalar úıi tárbıelenýshisiniń armanyn oryndady, – dep habarlaıdy Polisia.kz.

Islam Súleımenovtiń oqıǵasyn erekshe mereke qarsańyndaǵy naǵyz ǵajaıyp dep ataýǵa bolady.

14 jastaǵy Islam – Shymkenttegi №4 balalar úıiniń tárbıelenýshisi. Ol kishkentaıynan polıtsııa qyzmetkeri bolýdy armandaıdy. Forma kıgen patrýldik kóliktegi adamdardyń jumysyn qyzyǵa baqylaıdy eken.

Tártip saqshylary jasóspirimniń armanyn júzege asyrýdy uıǵaryp, polıtsııa departamentine shaqyrdy. Munda Islamǵa polıtsııa basqarmasynyń “júregi” – jedel basqarý ortalyǵy kórsetildi.

Ol úlken zaldyń qabyrǵasyn alyp jatqan ekrandar arqyly megapolıs ómirin tamashalaý kezinde túrli emotsııaǵa bólendi.

JBO-ǵa barǵannan keıin mektep oqýshysy patrýldik polıtsııa polkiniń qyzmettik kóliginiń júrgizýshi oryndyǵyna otyryp, kólik ishindegi qural-jabdyqtarmen tanysyp, naǵyz ratsııa arqyly baılanysqa shyqty.

Osydan soń Islam qalanyń bas polıtseıimen kezdesti. Dýman Taev ony jyly qabyldap, bolashaq ofıtsermen kezdeskenine qýanyshty ekenin bildirdi.

8-synyp oqýshysy quqyq qorǵaý mamandyǵyn tańdaıtynyn, óıtkeni ol árqashan adamdardy qorǵap, olarǵa kómektesýdi qalaıtynyn aıtty. Dýman Taev jetkinshekke óz fýrajkasy men qolsaǵatty syıǵa tartyp, alǵa qoıǵan barlyq arman-maqsattaryna jetýin, bolashaǵy jarqyn bolýyn tiledi.

Aıta keteıik, №4 balalar úıiniń tárbıelenýshileri tórt jyldan astam ýaqyttan beri Shymkent qalasy PD qyzmetkerleriniń qamqorlyǵynda. Al osy mekemeniń úsh túlegi búginde QR ІІM Qaraǵandy akademııasynyń kýrsanty.