Shymkent pen Túrkistanda aptap ystyq jalǵasady
ShYMKENT. KAZINFORM — Elimizdiń ońtústiginde aptap ystyqtyń beti qaıtar emes. Shymkent pen Túrkistan oblysynda aýa temperatýrasy +40 gradýstan joǵary bolyp tur.
Áleýmettik jelilerde kóshedegi termometrdiń kórsetkishi +66 gradýsqa jýyqtaǵan vıdeo keńinen tarady. Beınejazba avtory bir termometrdi kúnniń astyna, ekinshisin kóleńkege qoıyp, olardyń kórsetkishin salystyrǵan.
— Shymkent, 12 shilde. Kún astynda +64 gradýs, tipti +66-ǵa jýyqtap tur. Al kóleńkede +41 gradýs, — deıdi vıdeoda jergilikti turǵyn.
Meteorologtar kúndelikti qoldanylatyn termometr kórsetkishi men resmı derekterdiń aıyrmashylyǵy ólsheý ádisine baılanysty ekenin túsindirdi. Sınoptıkter aýa temperatýrasyn halyqaralyq talaptarǵa sáıkes tek kóleńkede ólsheıdi.
«Qazgıdromet» RMK málimetinshe, 12 shildede Shymkentte aýa temperatýrasy +38,2°C boldy.
— Túrkistan oblysyndaǵy eń joǵary temperatýra +42°C deńgeıinde tirkeldi. Bul kórsetkish oblystyń soltústik-shyǵysyndaǵy Qyzylqum meteostantsııasynda baıqaldy. Jalpy óńirde kúndizgi temperatýra +34-ten +42°C aralyǵynda boldy, — dep habarlady vedomstvo resmı saýalǵa bergen jaýabynda.
Sınoptıkterdiń boljamynsha, aldaǵy kúnderi óńirde ystyq odan ári kúsheıedi. 14 shildede Shymkentte aýa temperatýrasy +39…+41°C-qa deıin kóteriledi. Soltústik-batystan soǵatyn jeldiń ekpini sekýndyna 15-20 metrge jetedi.
Al 15-16 shilde kúnderi kúndizgi aýa temperatýrasy +42…+44°C bolady. Túngi temperatýra +23…+25°C shamasynda saqtalady.
Shymkent qalasynyń Tótenshe jaǵdaılar departamenti 17 shildege deıin qala aýmaǵynda joǵary órt qaýpi saqtalatynyn eskertti.
— Qurǵaq ári ystyq aýa raıynda órt shyǵý qaýpi aıtarlyqtaı artady. Azamattardy órt qaýipsizdigi talaptaryn saqtaýǵa, otty paıdalaný kezinde barynsha saq bolýǵa shaqyramyz. Órt belgileri baıqalǵan jaǵdaıda 101 nemese 112 nómirine dereý habarlaý qajet, — delingen vedomstvonyń habarlamasynda.
Aptap ystyq Shymkentpen kórshiles Túrkistan oblysynda da saqtalady. Sınoptıkterdiń málimetinshe, 14-15 shildede óńirdiń basym bóliginde kóleńkedegi aýa temperatýrasy +44°C-qa deıin jetedi. Beısenbi kúni keı jerlerde +46°C, al taýly aýdandarda +37°C bolýy múmkin. Aldaǵy kúnderi jaýyn-shashyn bolmaıdy.
Buǵan deıin sınoptıkter Qazaqstannyń ońtústigine Ózbekstan aýmaǵynan qurǵaq ári ystyq aýa massalarynyń kelýi jalǵasatynyn habarlaǵan bolatyn. Sonyń áserinen óńirde aýa temperatýrasy +40-45°C shamasynda saqtalady. Al eldiń soltústik óńirlerinde soltústik-batys tsıklonynyń yqpalymen jańbyr, naızaǵaı jáne burshaq boljanyp, aýa temperatýrasy +25-30°C-qa deıin tómendeıdi.
Aıta keteıik, «Qazgıdromet» sınoptıkteri 13 shildede elimizdiń birqatar óńirinde aýa raıyna baılanysty eskertý jarııalaǵan bolatyn.
