Shymkent mańyndaǵy zaýytta qaza bolǵan eki adamnyń ólimine kináli kúdiktiler ustaldy

ShYMKENT. KAZUNFORM - Shymkent qalasynyń aýmaǵyndaǵy zaýyttardyń birinde abaısyzda eki adamnyń ólimine ákep soqqan eńbekti qorǵaý qaǵıdalaryn buzý jaǵdaıy boıynsha polıtsııa qylmystyq is qozǵady.

Atalǵan is boıynsha eki kúdikti ýaqytsha ustaý ızolıatoryna qamaýǵa alyndy.

- Qazirgi tańda oqıǵanyń mán-jaıyn anyqtaýǵa baǵyttalǵan keshendi tergeý áreketteri júrgizilip jatyr. Tergeý aıaqtalǵan soń is boıynsha zańǵa sáıkes protsessýaldyq sheshim qabyldanatyn bolady, - delingen Shymkent qalalyq polıtsııa departamentiń baspasóz qyzmeti taratqan aqparatta.

Osyǵan deıin Shymkenttegi munaı óńdeý zaýytynda avtokótergish aýdarylyp, eki adam qaza tapqany týraly habarladyq.

Zaýyt «PetroKazakhstan Oil Products» JShS-ne tıesili bolyp shyqty.