Shymkent — «Kitap oqıtyn ult» jobasyna alǵashqy bolyp qosylǵan óńirlerdiń biri
ShYMKENT.KAZINFORM — Shymkent qalasy — elimizde alǵashqylardyń biri bolyp «Kitap oqıtyn ult» respýblıkalyq jobasyna resmı túrde qosyldy. Bul týraly qala ákimi Ǵabıt Syzdyqbekov málimdedi.
Memleket basshysy Qasym-Jomart Toqaev Atyraýda ótken Ulttyq quryltaıdyń úshinshi otyrysynda: «Ozyq oıly ult bolýdyń eń tóte joly — kitap oqý» dep atap ótip, kitap oqýdy damytý máselesine erekshe nazar aýdarǵan bolatyn.
Prezıdent bastamasyn qoldaǵan Májilis tóraǵasy, «AMANAT» partııasynyń tóraǵasy Erlan Qoshanov jýyrda respýblıkalyq deńgeıde «Kitap oqıtyn ult» pılottyq jobasynyń bastalǵanyn resmı túrde jarııalady. Bul mańyzdy joba alǵash bolyp engiziletin óńirler qatarynda Shymkent qalasy, sondaı-aq Qaraǵandy jáne Qostanaı oblystary bar.
Shymkent qalasynyń ákimi Ǵabıt Syzdyqbekov atalǵan bastamaǵa qoldaý bildire otyryp, turǵyndardy belsendi qatysýǵa shaqyrdy.
— Shymkent — tek respýblıkalyq mańyzy bar megapolıs qana emes, ol — tarıhy tereń, mádenıeti baı, bilim salasynyń dástúri qalyptasqan shahar. Sondyqtan dál osyndaı mańyzy zor jobanyń bizdiń qalada júzege asýy — zańdylyq. Kitap — bilim men shabyttyń sarqylmas qaınary. Ol kókjıegińdi keńeıtedi, tulǵańdy qalyptastyrady, jańa múmkindikterge jol ashady. Árqaısyńyzdy osy ıgi bastamany qoldap, belsendi qatysýǵa shaqyramyn, — dedi qala basshysy.
Jobanyń maqsaty — kitap oqý mádenıetin qalyptastyrý jáne dáripteý.
Pılottyq joba aıasynda qala turǵyndary kelesi nomınatsııalar boıynsha baıqaýǵa qatysa alady:
• «Kitap oqıtyn mektep»
• «Kitap oqıtyn kolledj»
• «Kitap oqıtyn ýnıversıtet»
• «Kitap oqıtyn pedagog»
• «Kitap oqıtyn áýlet»
• «Kitap oqıtyn memlekettik qyzmetker»
Qatysýshylarǵa qoıylatyn ortaq talap — joba barysynda keminde 15 kitap oqyp, óz sanaty boıynsha baıqaýǵa qatysý. Jeńimpazdar arnaıy komıssııa sheshimimen anyqtalyp, qurmet gramotalary jáne baǵaly syılyqtarmen marapattalady.
Jobany kim júzege asyrady?
Jobany «AMANAT» partııasy «Kitap oqıtyn ult — Chıtaıýşaıa natsııa» qoǵamdyq qorymen birlesip júzege asyrýda. Bas demeýshi — ALAGEUM ELECTRIC kompanııasy.
Jobanyń mańyzdylyǵy nede?
«Kitap oqıtyn ult» — bul bir rettik aktsııa emes, ulttyń mádenı deńgeıi men oılaý órisin arttyrýǵa baǵyttalǵan uzaqmerzimdi jobalardyń biri. Jastardyń ıntellektýaldyq áleýetin kóterip, kitap oqý arqyly adam kapıtalyn damytý — jobanyń basty maqsaty.
Joba arqyly tek oqýshylar men stýdentter ǵana emes, pedagogter men memlekettik qyzmetshiler, tutas otbasylar da qamtylady. Bul — qoǵamnyń árbir múshesin kitappen baılanystyrýǵa arnalǵan keshendi qadam.