Shymkent kóshelerindegi ashyq qudyqtar turǵyndardy alańdatyp otyr
ShYMKENT. KAZINFORM — Qala kóshelerindegi káriz qudyqtaryn jol jóndegen merdiger búldirip ketken.
Turan shaǵynaýdanyndaǵy Oıqaraǵan kóshesinde jaǵdaı óte kúrdeli. Jergilikti turǵyndardyń aıtýynsha, mundaǵy qudyqtardyń 80 paıyzy ashyq, keıbiri qıyrshyq taspen toltyrylǵan, al keıbiri asfaltpen jabylyp ketken. Munyń sebebi — urlyq emes, kerisinshe jeke merdiger kompanııa júrgizgen jol jóndeý jumystarynyń áserinen bolǵan.
— Eki aı buryn merdiger jańa asfalt tósedi, alaıda burynnan bar káriz júıesin eskermedi. Sonyń saldarynan qudyqtar buzylyp, qaqpaqtar alynyp tastaldy, al keıbir kommýnıkatsııalar asfalt astynda qaldy, — deıdi narazy turǵyndar.
Halyqtyń alańdaýy da beker emes. Keıbir úıler júıege qosylǵan. Sondyqtan aǵyn sýlar qubyrlarǵa aǵyp, tolyp ketý qaýpin tóndirip tur. Sondaı-aq, mundaǵy kópshilik ashyq qudyqtarǵa balalar ne kólikter túsip ketýi múmkin dep qaýiptenedi. Jaǵdaıdy ýshyqtyryp otyrǵan taǵy bir másele — tóńirekke jaıylyp ketken jaǵymsyz ıis. Halyq barynsha qaýipsizdik sharalaryn jasap, qudyqtardy kólik dóńgelekterimen, taqtaılarmen, eski esiktermen jaýyp jatyr.
Qalalyq sý jáne káriz basqarmasy da másele bir ǵana kóshemen shektelmeıtinin rastap otyr. Jýyrda asfalt tóselgen barlyq ýchaskelerde qudyqtar zaqymdalǵan nemese asfaltpen jabylyp qalǵan.
— Merdigerler qaqpaqtardy syndyryp, lıýkterdi ysyryp, qudyqtardy kómip jatyr. Qulap ketý qaýpi óte joǵary. Munyń sońy qaıǵyly oqıǵaǵa ulasýy múmkin dep qatty alańdap otyrmyz, — deıdi basqarma basshysy Baǵdat Baıbolov.
Onyń aıtýynsha, jol jóndeý kezinde memlekettik múlikke keltirilgen zalaldy merdiger uıymdar óteýge mindetti. Jyl basynan beri 100-den astam qudyq búlingen. Shymkentte shamamen 5 000 shaqyrymdyq sý jáne káriz jelileri bar jáne káriz júrgizilip, artynan asfalt tóselgen barlyq kóshelerde qudyqtar zaqymdanǵan.
Sondaı-aq, qańtar aıynan beri qalada 100-ge jýyq qaqpaq urlanǵan. Polıtsııaǵa aryzdar túskenimen, ázirge olardyń birde-biri tabylǵan joq.
Árbir qaqpaqtyń ortasha quny — 20 myń teńge. Tek byltyrdyń ózinde qudyqtardy qalpyna keltirýge shamamen 20 mıllıon teńge jumsalǵan. Zań boıynsha merdigerler keltirilgen zııandy óteýi tıis, biraq bul talap árdaıym oryndala bermeıdi.
Óz kezeginde Turan shaǵynaýdanynda jumys júrgizgen merdiger kompanııa ókilderi jobanyń áli aıaqtalmaǵanyn jáne zaqymdanǵan barlyq ýchaskeler qalpyna keltiriletinin málimdedi.
Aıta keteıik, budan buryn Shymkentte shuńqyrdan 7 jastaǵy balanyń denesi tabylǵanyn jazǵan bolatynbyz.