Shymkent kóshelerinde qaraýsyz júrgen jylqylar turǵyndardyń narazylyǵyn týdyrdy
ShYMKENT. KAZINFORM — Shymkent kóshelerinde úıir jylqy erkin jaıylyp júr.
Turǵyndardyń aıtýynsha, jylqylar kóshe boıyndaǵy kógaldar men kóshetterdi búldirip, kólik qozǵalysyna kedergi keltirgen. Olardyń sózinshe, bul jaǵdaı jaıaý júrginshiler men júrgizýshilerge de qaýip tóndiredi.
— Turan shaǵynaýdany jylqynyń jaıylymyna aınalyp barady. Qazirdiń ózinde kóshede 50 shaqty jylqy júr. Balalarymyzǵa alańdaımyz. Ekken kóshetter men gazondar ne boldy? Bul jylqylardyń ıesi joq pa? Qala ortalyǵynda tórt túliktiń erkin jaıylyp, ortaq múlikke zııan keltirýine jáne kólikterdiń qozǵalysyna kedergi keltirýine jol berýge bola ma? — deıdi qala turǵyny.
Qarataý aýdany ákimdiginiń málimetinshe, atalǵan jaǵdaı boıynsha jaýapty mamandar jergilikti polıtsııa qyzmetkerlerimen birlesip, jedel shara qabyldaǵan.
— Turan-2 shaǵynaýdany, Alataý Batyr kóshesiniń boıynda qaraýsyz júrgen jylqylarǵa qatysty ákimshilik hattamalar toltyrylyp, aıyppul salyndy. Sondaı-aq mal ıesine zań talaptaryn saqtaý boıynsha túsindirý jumystary júrgizildi. Másele baqylaýda, — dep habarlady vedomstvo.
Polıtsııa departamentiniń málimetine sáıkes, janýarlarǵa jaýapkershilikpen qaraý salasyndaǵy zańnama talaptaryn saqtamaǵany úshin bıylǵy jyldyń 8 aıynda 134 adam ákimshilik jaýapkershilikke tartylǵan. Olarǵa jalpy 1 mln 946 myń 250 teńge aıyppul salynǵan.
Buǵan deıin Pavlodar oblysynda tórt túlikti baqylaýsyz qaldyrǵan 1300-den astam turǵyn ákimshilik jaýapkershilikke tartylǵanyn jazǵan edik.
