QQS mólsherlemesin arttyrý: Medıtsınadaǵy joǵary mólsherleme medkómekke qol jetkizýdi qıyndatýy múmkin
ShYMKENT. KAZINFORM — Shymkent qalasynyń Kásipkerler palatasynda bıznes ókilderi ulttyq ekonomıka vıtse-mınıstri Baýyrjan Qudaıbergenovpen kezdesti.
Jıynda aldaǵy salyq reformalary, sonyń ishinde QQS mólsherlemesin arttyrý máseleleri talqylandy. Basqosýǵa ákimdiktiń, memlekettik kirister departamentiniń ókilderi jáne máslıhat depýtattary qatysty.
Kezdesýdi ashqan Kásipkerler palatasynyń dırektory Sábıra Adambekova Prezıdent salyq júıesine qatysty ózgeristerdi ázirleý kezinde bıznestiń pikirin eskerýdi tapsyrǵanyn eske saldy. Qala ákiminiń orynbasary Aıdyn Kárimov kásipkerlik pen ekonomıkany damytýdy qoldaýǵa múmkindik beretin teńdestirilgen tásildiń mańyzyn atap ótti.
Ulttyq ekonomıka vıtse-mınıstri Baýyrjan Qudaıbergenov Úkimettiń usynymdaryn tanystyrdy.
- Qazaqstandaǵy QQS eń tómen mólsherlemelerdiń biri. QQS tabystyń mańyzdy kózi bolyp sanalatynyna qaramastan, 2022 jyly onyń úlesine JІÓ-niń tek 4%-y ǵana tıesili boldy, bul salystyrmaly kiris deńgeıi 7% bolatyn elder boıynsha ortasha kórsetkishten áldeqaıda tómen. QQS-ty nyǵaıtý kiristi arttyryp qana qoımaı, munaıdan túsetin qubylmaly kiristerge táýeldilikti azaıtady jáne elimizdiń ınfraqurylym men ındýstrııany damytý baǵdarlamasyn qarjylandyrýǵa kómektesedi, — dedi vıtse-mınıstr.
Memlekettik organdar QQS-tyń jalpy mólsherlemesin 16%-ǵa deıin ulǵaıtýdy, al birqatar salalar úshin tómendetilgen mólsherlemeni 10%-ǵa engizýdi usynady, alaıda mundaı salalardyń naqty tizbesi áli naqty aıqyndalmaǵan. Aýyl sharýashylyǵy ónimderin óndirýshilerdi salyqtan tolyǵymen bosatý josparlanyp otyr. Densaýlyq saqtaý salasy úshin de salyq júktemesin azaıtý qarastyrylýda.
Kezdesý barysynda kásipkerlerdiń salalyq keńesteriniń ókilderi bıznes atynan suraqtar qoıyp, usynystaryn jetkizdi.
Atap aıtqanda, Shymkent qalasy ÓKP Óńirlik keńesiniń múshesi, «Keremet-Ońtústik «bóbekjaı baǵy» JShS basshysy Dıana Qaramanova áleýmettik mekemelerdi QQS-tan bosatýdy nemese qyzmetterdiń qoljetimdi bolýy úshin salyqtyq jeńildikter berýdi usyndy.
«Shymkent qalasy men Túrkistan oblysynyń jeke klınıkalar qaýymdastyǵynyń» basshysy Ánýarbek Maımaqov medıtsınadaǵy joǵary mólsherleme medıtsınalyq kómekke qol jetkizýdi qıyndatýy múmkin ekenin aıtty.
Salalyq keńes múshesi Dáýlet Qanashaev Salyq jáne Kásipkerlik kodeksterine ózgerister engizý kezinde jeńil ónerkásiptiń erekshelikterin eskerýdiń mańyzyn atap ótti.
Qorytyndylaı kele, vıtse-mınıstr Baýyrjan Qudaıbergenov barlyq usynystar jınaqtalyp, saraptalyp, jumys barysynda eskeriletinine sendirdi.
Eske salsaq Úkimet QQS mólsherlemesine qatysty jańa usynys aıtqan edi.