Shymkent kásipkerleri qurylysqa lıtsenzııa alý úshin birdeı qujattardy 10 ret tapsyrýǵa májbúr bolǵan

Shymkenttik kásipkerler qurylys-montajdaý jumysyna lıtsenzııa alý úshin birdeı qujattardy 10 márte tapsyrýǵa májbúr bolǵan, dep habarlaıdy Kazinform.

Shymkent qalasy boıynsha sybaılas jemqorlyqqa qarsy qyzmet qurylys-montajdaý jumysyna lıtsenzııa alýdaǵy júıeli kedergini joıdy.

Atalǵan qyzmetti júzege asyrý talaptarynyń biri — óndiristik bazanyń jáne ınjenerlik-tehnıkalyq qyzmetkerdiń bolýy.

Eki jyl ishinde «eQurylys» júıesinde qajetti málimetterdiń joqtyǵyna baılanysty jergilikti atqarýshy organ 260-qa jýyq ótinishke lıtsenzııa berýden bas tartqan.

Tipti keı jaǵdaılarda ótinish berýshiler lıtsenzııa alý úshin birdeı qujattardy 10 ret tapsyrýǵa májbúr bolǵan.

«Atalǵan júıe málimetterdi engizý jáne olardy túzetý kúnin kórsetpeıdi. Bas tartýdyń negizi bar-joǵyn tekserý múmkin emes. Qalalyq Antıkordyń aralasýynan keıin mundaı tájirıbe toqtatylyp, jergilikti atqarýshy organnyń buıryǵymen osy negiz boıynsha lıtsenzııa berýden bas tartýǵa tyıym salyndy» delingen Shymkent qalasy boıynsha sybaılas jemqorlyqqa qarsy qyzmet usynǵan aqparatta.