Shymkent qalasynyń áleýmettik-ekonomıkalyq damý qarqyny qandaı
ShYMKENT. KAZINFORM – Shymkent qalasynda halyqtyń turmys sapasyn arttyrý, mádenı-rýhanı qundylyqtardy dáripteý jáne qoǵamdyq qaýipsizdikti qamtamasyz etý baǵytynda júıeli jumys istelip jatyr.
26–27 qyrkúıek kúnderi qalada ulttyq rýhanııatty ulyqtaıtyn «Asyl mura» respýblıkalyq dástúrli óner festıvali ótýde. «Qyzǵaldaq» saraıynda uıymdastyrylǵan óner merekesinde án, kúı, jyr, terme jáne dástúrli mektepterdiń taǵylymy kórermenge usynyldy. Qazaqstannyń halyq ártisteri men belgili mádenıet qaıratkerleri qatysqan kesh qala turǵyndaryna rýhanı qýat syılady.
Qala turǵyndarynyń qolaıly ómir súrýine jaǵdaı jasaý maqsatynda qoǵamdyq kólik salasynda da oń ózgerister bar. Jaqynda №150 jáne №146 baǵyttaryna 30 jańa zamanaýı avtobýs jolǵa shyqty. Qaraǵandy qalasynda qurastyrylǵan Yutong markaly avtobýstar jolaýshylarǵa yńǵaıly ári qaýipsiz qyzmet kórsetedi. Bul – qalalyq kólik júıesiniń sapasyn arttyrýǵa jasalǵan qadam.
Áleýmettik qoldaý salasynda qarttardy qorǵaý basty nazarda. 1 qazan – Qarttar kúnine oraı zeınetkerlerge bir rettik áleýmettik kómek kórsetiledi. Sonymen qatar, jalǵyzilikti qarııalarǵa aı saıynǵy tólem qarastyrylǵan. Shymkent qalasynda 99 myńnan astam zeınetker bar, olardyń densaýlyǵyn jaqsartý úshin jyl saıyn 7 myńnan astam adamǵa sanatorlyq emdelýge joldama beriledi. Bul baǵytta «Іzetti zeınetker» kommýnaldyq mekemesi júıeli jumys istep jatyr.
Qoǵamdyq qaýipsizdik te nazardan tys qalǵan joq. Ótken aptada 175 qylmystyq is tirkeldi, olardyń basym bóligi ınternet-alaıaqtyq pen urlyq derekterine qatysty. Qala turǵyndaryna óz bank kartalaryn bógde adamdarǵa bermeý, taýardy tek resmı dúkenderden satyp alý týraly aqparat berilip, eskertý jasaldy. Sondaı-aq, jol-kólik oqıǵalarynyń aldyn alý maqsatynda júrgizýshilerge tártip saqtaý, al ata-analarǵa kámelet jasyna tolmaǵan balalarǵa skýter men samokat júrgizýge jol bermeý qajettigi aıtyldy.
Eńbek kúnine oraı «Arbat» demalys aımaǵynda óńiraralyq bos jumys oryndary jármeńkesi ótti. Onda 100-den astam jumys berýshi turǵyndarǵa qyzmet usyndy, al úzdik eńbek ozattary arnaıy marapattaldy.
Qoǵamdyq tynyshtyqty saqtaý úshin túngi mezgilde pırotehnıkalyq buıymdardy qoldanýǵa baqylaý kúsheıtildi. Jyl basynan beri zańsyz feıerverk atqandarǵa 9,6 mln teńgeden astam aıyppul salyndy.
Qala ınfraqurylymyn damytý baǵytynda da mańyzdy qadam jasaldy. Eńbekshi aýdanyndaǵy Qoıkeldi Batyr – Aqnazarhan kóshelerindegi temirjol ótkeli kúrdeli jóndeýden keıin qaıta ashyldy. Jańartylǵan kópir turǵyndarǵa qaýipsiz ári yńǵaıly qozǵalys jasaýǵa múmkindik beredi.
Sonymen qatar, Turan aýdany Arǵymaq shaǵynaýdanynyń áleýmettik nysandarmen qamtylý máselesi boıynsha turǵyndarmen arnaıy kezdesý ótkizilidi. Shaǵynaýdan turǵyndaryna kórshiles ornalasqan Qulager jáne Aqjar shaǵynaýdandaryndaǵy mektepter men balabaqshalar qyzmet kórsetýde. Medıtsınalyq kómek te jaqyn mańdaǵy ambýlatorııa arqyly qamtamasyz etilgen. Al ınfraqurylymdyq júıelerdiń basym bóligi iske qosylǵan.
Jalpy, Shymkent qalasynyń ákimdigi turǵyndardyń ómir sapasyn arttyrý, áleýmettik qoldaýdy kúsheıtý, qoǵamdyq qaýipsizdikti qamtamasyz etý jáne ınfraqurylymdy damytý baǵytynda keshendi jumystardy júıeli túrde jalǵastyryp jatyr.