Shymkent qalasynda Túrkııa kóshesi paıda bolmaq

Shymkent qalasy Eńbekshi aýdanynyń ortalyǵynda ornalasqan saıabaqqa «Qazaqstan-Túrkııa dostyǵy saıabaǵy» ataýy berilýi múmkin, dep habarlaıdy Kazinform.

«Shymkent qalasynyń keıbir quramdas bólikterine mynandaı ataý berilsin:

Abaı aýdany boıynsha: Shymsıtı shaǵyn aýdanyndaǵy ataýy joq kóshege – Túrkııa kóshesi;

Eńbekshi aýdany boıynsha: aýdan ortalyǵyndaǵy ataýy joq saıabaqqa – «Qazaqstan-Túrkııa dostyǵy saıabaǵy» degen», – dep jazylǵan Ashyq NQA portalynda jarııalanǵan ákimdik pen qalalyq máslıhattyń birlesken sheshim-jobasynda.

Qujat 1 qarashaǵa deıin kópshilik talqylaýda bolady.

Qosa ketsek, taıaýda Kókshetaý qalasynyń birqatar kóshesine qazaqsha ataýlar beriletinin jazyp edik.