Shymkent qalasynda tennısten jasóspirimder álem chempıonatyna irikteý týrnıri bastaldy

ShYMKENT. KAZINFORM – Shymkent qalasynda jasóspirimder arasynda Asia/Oceania Final Qualifying Juniors Davis Cup jáne Juniors Billie Jean King Cup irikteý týrnıri bastaldy.

Osy aıdyń 25-ine deıin sozylatyn jarysqa 16 jasqa deıingiler arasynda Azııa – Tynyq muhıt aımaǵynyń jasóspirimder komandalary qatysyp jatyr.

Jasóspirimder arasynda álem chempıonatyna joldama alý úshin birinshi bolyp qyzdar saıysqa túsedi. Munda Qazaqstan, Aýstralııa, qytaılyq Taıbeı, Gonkong, Úndistan, Indonezııa, Malaızııa, Iran, Japonııa, Ońtústik Koreıa, Qyrǵyzstan, Mońǵolııa, Jańa Zelandııa, Taıland, Ózbekstan, Vetnam elderiniń tennısshileri baq synaıdy.

Shymkent qalasyndaǵy Belline Arena ulttyq tennıs ortalyǵynda ótkizilgen jerebege sáıkes qazaqstandyqtar A tobynda Japonııa, Indonezııa jáne Vetnam quramalarymen oınaıdy.

Búgin ıAroslava Shvedovanyń shákirtteri Vetnam qyzdarymen sheberlik baıqasady.

Qazaqstan namysyn myna sportshylar qorǵaıdy:

1. Arıana Gogýlına (Astana),

2. Albına Kákenova (Astana),

3. Eva Korysheva (Aqtóbe),

4. Sátıma Tóregen, qosalqy oıynshy (Almaty).

Kapıtan: ıAroslava Shvedova.

Ótken jyly 16 jasqa deıingiler arasynda Qazaqstan jasóspirimder quramalary Devıs jáne Bıllı Djın Kıng kýboginiń irikteý saıystaryn sátti ótkizip, Qazaqstan tennısi tarıhynda alǵash ret álem chempıonatyna joldama alǵan edi.

Eske sala keteıik, budan buryn Aleksandr Býblıktiń juptyq synda Rım masters týrnıriniń shırek fınalyna shyqqanyn jazǵan bolatynbyz.

Qazaqstandyq tennısshiler Týnıs pen Portýgalııadaǵy jarysty sátti bastady.