«Kúldiretin gaz»: Shymkent qalasynda 400 ballon azot totyǵy tárkilendi

ShYMKENT. KAZINFORM — Shymkent qalasynda «oıyn-saýyqqa arnalǵan gaz» satýmen aınalysqan 10 mekeme ıesi jaýapqa tartylyp, 400-den astam ballon azot totyǵy tárkilendi, dep habarlaıdy Polisia.kz.

Shymkent qalasynyń polıtsııa departamenti azamattardyń densaýlyǵyna qaýip tóndiretin zattardyń zańsyz aınalymyna tosqaýyl qoıý maqsatynda júıeli sharalar qabyldap jatyr.

Jyl basynan beri qala aýmaǵynda «kúldiretin gaz» ataýymen tanymal azot totyǵyn satýmen aınalysqan 10 oıyn-saýyq orny anyqtalyp, olardyń zańsyz qyzmeti toqtatyldy. Barlyǵy 417 ballon tárkilenip, adam aǵzasyna kúshti áser etetin zattar zańsyz aınalymnan alyndy. Anyqtalǵan derekter boıynsha sotqa deıingi tergep-tekserý amaldary bastaldy.

Polıtsııa qoldanystaǵy zańnamaǵa sáıkes kúshti áser etetin zattardyń, onyń ishinde azot totyǵynyń zańsyz aınalymy úshin qylmystyq jaýapkershilik kózdelgenin eskertedi.

Aıta keteıik, QR Іshki ister mınıstrligi Shymkent qalasynda asa iri kólemdegi alaıaqtyq jáne bopsalaý derekterine qatysty zańsyz áreketterdiń jolyn kesti.