Shymkent ákiminiń orynbasaryna shabýyl jasaýǵa ne sebep bolýy múmkin

ASTANA. KAZINFORM — Shymkent qalasy ákiminiń orynbasary Rýslan Berdenovke jasalǵan qarýly shabýylǵa qatysty tergeý amaldary jalǵasyp otyr.  

Bul jaǵdaıǵa qalalyq ishki saıasat jáne jastar isi bóliminiń basshysy Áıgerim Jumaǵulova túsinik berdi. Ol kúdiktiniń áıeli Berdenovpen tanys emes ekenin atap ótti.

— Polıtsııa bóliminde ustalǵan adamnyń áıelimen sóılestim. Aıǵaq berýge kelgen áıel Berdenovti tanymaıtynyn aıtty. Ondaı jaǵdaıda qandaı qysym kórsetý týraly aıtýǵa bolady? Tergeý qorytyndysy shyqqansha, sot úkim shyǵarǵansha sizge úzildi-kesildi aıyp taǵýǵa kim quqyq berdi?! Seksýaldyq qysym kórsetý nusqasyn aıtyp qana qoımaı, kúdiktini aqtaıtyn (sot sheshimi shyqqanǵa deıin ol osy mártebede qalady), tergeýsiz sotty aqtaıtyn adamdardy túsinbeımin, — dedi Jumaǵulova.

Ol BAQ ókilderin, blogerler men quqyq qorǵaýshylardy zańdy buzbaýǵa jáne jalǵan aqparat jarııalamaýǵa shaqyrdy.

— BAQ, blogerler, quqyq qorǵaýshylar — Qazaqstan Respýblıkasynyń zańdaryn este saqtańyzdar. Kúdiktiniń, onyń jubaıynyń jeke derekteriniń, olardyń áleýmettik jelidegi paraqshalary men fotosýretteriniń jarııalanýy, tekserilmegen málimetterdiń fakt retinde kórsetilýi — munyń bárine eń aldymen medıa zańgerler baǵa beredi dep oılaımyn. Men sondaı-aq eki otbasynyń balalaryn oılaýǵa shaqyramyn. Jeke derekterdi jarııalaý arqyly siz olardyń bolashaǵyna qaýip tóndiresiz. Aqparatty teksermeı, bireýdi seksýaldy qysym kórsetti dep aıyptamas buryn eki januıany qandaı jaǵdaıǵa qoıatynyńyz týraly bir sát oılanyńyz. Múmkin toqtaıtyn kez keldi, — dep jazdy ol. 

Eske sala ketsek, Shymkentte qala ákiminiń orynbasary Rýslan Berdenovke qastandyq jasalǵany týraly jazǵan bolatynbyz. 

Jýrnalıst, belgili kásipker Beıbit Álibekov bolǵan jaǵdaıdy qaladaǵy qurylys salasynda tártip ornatýmen baılanysty bolýy múmkin ekenin atap ótti.