Rýslan Berdenovke jasalǵan qastandyq týraly is sotqa joldandy

ShYMKENT. KAZINFORM — Aldyn ala tyńdaý 28 shildege belgilendi, dep jazdy Kazinform agenttiginiń tilshisi.

Shymkent qalasy ákiminiń orynbasary Rýslan Berdenovke jasalǵan qastandyq boıynsha qylmystyq is qylmystyq ister jónindegi mamandandyrylǵan aýdanaralyq sotqa joldandy.

Sottyń baspasóz qyzmetiniń málimetinshe, aıyptalýshy Ernar Jıenbaı eki birdeı bap boıynsha qylmystyq jaýapkershilikke tartylyp otyr.

— Shymkent qalasynyń qylmystyq ister jónindegi mamandandyrylǵan aýdanaralyq sotyna Jıenbaıǵa qatysty qylmystyq is kelip tústi. Ol QR Qylmystyq kodeksiniń 24-baby 3-bóligi («Qylmysqa daıyndalý jáne qylmys jasaýǵa oqtalý») jáne 99-baby 1-bóligi («Adam óltirý») boıynsha aıyptalyp otyr, — delingen sottyń baspasóz qyzmeti taratqan aqparatta.

Aldyn ala tyńdaý 28 shilde kúni saǵat 10:00-de ótedi.

Buǵan deıin Kazinform agenttigi Rýslan Berdenovke qastandyq jasaý isi boıynsha tergeý aıaqtalǵanyn habarlaǵan bolatyn.

Eske salaıyq, 21 sáýir kúni Shymkent qalasy ákimdigi ǵımaratynyń mańynda ákimniń orynbasary jaraqat alǵan. Ol dereý aýrýhanaǵa jetkizilip, ota jasalǵan. Eki aptadan keıin Berdenov aýrýhanadan shyqqan.

Kúdikti Ernar Jıenbaı, buryn «Turǵyn úı Shymkent» JShS dırektorynyń mindetin atqarǵan, oqıǵa ornynda ustaldy. Sol kúni sot oǵan qatysty eki aı merzimge qamaýǵa alý túrindegi bultartpaý sharasyn sanktsııalaǵan.

Qylmystyq is eki bap boıynsha qozǵaldy.

Shymkent qalasy ákimdiginiń resmı jaýabyna sáıkes, qazirgi ýaqytta Rýslan Berdenov qyzmetine oralmaǵan, eńbek demalysynda.

Onyń ornyna ýaqytsha mindetin Shymkent qalasy ákiminiń birinshi orynbasary Qýanysh Asylov atqaryp jatyr.