Shymkent qala turǵyndary ekologııalyq aktsııada belsendilik tanytty
ShYMKENT. KAZINFORM – Shymkentte World Cleanup Day halyqaralyq kúnine jáne respýblıkalyq «Taza Qazaqstan» bastamasyna oraı aýqymdy jalpyqalalyq senbilik ótti. Qala turǵyndary, volonterler, jastar, memlekettik organdardyń, qoǵamdyq uıymdardyń ókilderi jalpy 43 myńnan astam turǵyn birigip, qalamyz ben tabıǵı aýmaqtardy taza ustaýda belsendilik tanytty.
Demalys kúniniń tańy Astana alańynda myńǵa jýyq mektep oqýshysyn, stýdentterdi, joǵary oqý oryndarynyń ókilderi men volonterlik uıymdardyń múshelerin biriktirgen jastar jıynymen bastaldy.
Senbilik bastalar aldynda qatysýshylarǵa qorshaǵan ortany qorǵaý, aýlalarda, kóshelerde jáne qoǵamdyq oryndarda tazalyq saqtaý qala turǵyndarynyń ekologııalyq mádenıetin qalyptastyratyny aıtyldy.
Qala ákimdiginiń málimetinshe, jınalǵan myń volonter qaladaǵy bes aýdan boıynsha toptarǵa bólindi. Onyń ishinde, 200-ge jýyq adam qalalyq dendrosaıabaqta tazalyq jumystaryn júrgizse, qalǵandary kóshelerde, saıabaqtarda jáne aýlalarda jumys istedi.
A.Asqarov atyndaǵy dendrologııalyq saıabaqta uıymdastyrylǵan tazalyq is-sharasynda kópshilik aýmaqta sanıtarlyq tazalyq jumystaryn júrgizip, aǵash japyraqtaryn, qoqys jınaýǵa atsalysty.
Qala ákimi Ǵabıt Syzdyqbekov kópshilikke qorshaǵan ortany, óz aýlamyzdy taza ustaýdyń mańyzdy ekenin atap ótti. Tabıǵı ortany saqtaý jáne qorshaǵan ortany baıytýǵa da erekshe kóńil bólindi. Qala ákimi aktsııaǵa qatysýshylarmen birge dendrologııalyq saıabaqqa 25 qyrǵaýyldy ushyrý, 10 tıin men sý aıdynyna 150 keli balyqty jiberý is-sharasyna kýá boldy.
Jalpy, bul kúni qala boıynsha 270 tonnadan astam turmystyq jáne basqa da qaldyq shyǵaryldy. Sonymen qatar ırrıgatsııalyq aryqtar tazalanyp, kósheler jýyldy.
Sondaı-aq, keshe qaladaǵy meshit aýmaqtarynda da tazalyq jumystary júrgizildi. Іs-sharaǵa meshit jamaǵaty belsendi qatysyp, ǵımarat aınalasyn qoqystan tazartyp, aýmaqty retke keltirdi.
Jalpy, «Taza Qazaqstan» aktsııasy aıasyndaǵy jumystar qorshaǵan ortany taza ustaýmen qatar, turǵyndardy ortaq iske jumyldyryp, tazalyq mádenıetin qalyptastyrýǵa baǵyttalyp otyr.
