Shymkent elimizdegi aýasy eń kóp lastanǵan 10 qalanyń qataryna endi
ShYMKENT. KAZINFORM — Mamandar bul jaǵdaıdy eski avtokólikter sanynyń kóbeıýi, ónerkásip óndirisiniń ulǵaıýy jáne ındýstrııalyq aımaqtardyń keńeıýimen baılanystyrady.
Búginde Shymkentte ekologııalyq qaýiptiligi boıynsha birinshi sanattaǵy 40 kásiporyn, ekinshi sanattaǵy 146, úshinshi sanattaǵy 477 jáne tórtinshi sanattaǵy 368 kásiporyn tirkelgen.
2023-2025 jyldar aralyǵynda statsıonarlyq kózderden atmosferaǵa shyǵarylatyn zııandy zattardyń kólemi 31,6 myń tonnadan 40,05 myń tonnaǵa deıin artqan. Mamandar bul ósimdi jańa óndiris oryndarynyń iske qosylýy, ındýstrııalyq aımaqtardyń keńeıýi jáne avtokólik sanynyń artýymen túsindiredi.
Qazirgi tańda Shymkentte 438 255 kólik tirkelgen. Onyń ishinde eń kóbi, ıaǵnı 379 132-si — jeńil avtokólik. Sonymen qatar, 152 867 kólik 20 jyldan astam ýaqyttan beri paıdalanylyp keledi.
Budan bólek, qala joldarynda 32 594 júk kóligi, 6 309 avtobýs jáne 1 487 mototsıkl júredi. Kórshiles Túrkistan oblysynan kún saıyn qalaǵa kirip-shyǵatyn kólikter aǵyny da jaǵdaıdy kúrdelendirip otyr.
Qalalyq ekologııa departamentiniń basshysy Ermahan Qozybaevtyń aıtýynsha, 2025 jyldyń aqpan jáne maýsym aılarynda departament zerthanasy polıtsııa qyzmetkerlerimen birlesip avtokólikterden bólinetin zııandy zattardy baqylaý maqsatynda reıdter ótkizgen.
— Reıd barysynda 172 kólik tekserildi. Onyń 56-synda kóliktiń tútinindegi zııandy zattardyń mólsheri belgilengen normadan asyp ketkeni anyqtaldy. Nátıjesinde júrgizýshilerge Ákimshilik quqyq buzýshylyq týraly kodekstiń 334-baby boıynsha ákimshilik hattamalar toltyryldy, — dedi ol.
Qaladaǵy aýa sapasyn «Qazgıdromet» mekemesiniń jeti baqylaý beketi qadaǵalaıdy. Onyń tórteýi qolmen synama alady, al úsheýi avtomatty rejımde jumys isteıdi.
Monıtorıng nátıjesi boıynsha Shymkenttegi atmosferalyq aýanyń lastaný deńgeıi áli de joǵary kúıinde qalyp otyr. Eń kóp shekti mólsherden asý jaǵdaılary Samal-3 jáne Nursát shaǵynaýdandaryndaǵy beketterde tirkelgen.
2025 jyly aýa quramyndaǵy zııandy zattardyń shekti mólsherden asýy 10 927 ret tirkelgen. Osy kórsetkishter boıynsha Shymkent elimizdegi aýasy eń lastanǵan on qalanyń qataryna engen.
Ótken jyly qalalyq ekologııa departamenti kásiporyndarǵa 34 tekserý júrgizdi. Nátıjesinde 29 nusqama berildi. Ekologııalyq ruqsatsyz jumys istegen bes kásiporynnyń qyzmeti sot sheshimimen ýaqytsha toqtatylyp, aıyppul salyndy.
Sonymen qatar, quqyq qorǵaý organdarymen birlesip 50 ákimshilik is qozǵaldy. Aıyppuldardyń jalpy somasy 40,6 mln teńgeden asty. Onyń 32,6 mln teńgesi bıýdjetke óndirilip alynǵan.
Aıta keteıik, qalalyq ekologııa departamentinde 11 memlekettik qyzmetker jáne 13 shtattan tys maman jumys isteıdi. Olar ekologııalyq talaptardyń saqtalýyn baqylap, aýa, sý jáne topyraqtyń zerthanalyq monıtorıngin júrgizedi.
Buǵan deıin Shymkent qalasynyń ekologııa departamenti turǵyndardan túsetin shaǵymdardyń áli de azaımaı otyrǵanyn atap ótken bolatyn. Qala turǵyndary jeke sektorlarda mal ustaý, qoqys pen turmystyq qaldyqtardy órteý, monshalar men metall qabyldaý pýnktteriniń jumysy, túngi ýaqytta taralatyn ótkir ıister, kásiporyndardan shyǵatyn zııandy qaldyqtar jáne qalanyń túrli aýdandarynda paıda bolatyn beıbereket qoqys úıindileri týraly jıi habarlaıdy.
Túsken ótinishterdiń basym bóligi aýa sapasynyń tómendeýi men jaǵymsyz ıisterge qatysty bolyp otyr.
