Shymkent dendrosaıabaǵynda qylqan japyraqty aǵashtar qýrap jatyr
ShYMKENT. KAZINFORM — Shymkent qalasynyń turǵyndary Asanbaı Asqarov atyndaǵy dendrosaıabaqtyń jaǵdaıyna alańdaýshylyq bildirdi. Áleýmettik jelide dronmen túsirilgen vıdeo jarııalanǵannan keıin kópshilik qýrap, sarǵaıǵan qylqan japyraqty aǵashtardyń jaı-kúıine qatysty shaǵym aıtty.
Threads pen Instagram jelilerinde jarııalanǵan kadrlardan saıabaqtaǵy zaqymdanǵan qylqan japyraqty aǵashtar anyq kórinedi.
Jarııalanym áleýmettik jeli qoldanýshylary arasynda qyzý talqylandy. Pikirlerde shymkenttikter dabyl qaǵyp, jaýapty qyzmetterdiń jumysyn synǵa aldy. Olar megapolıstiń basty jasyl aımaǵy birtindep burynǵy kelbetin joǵaltyp bara jatqanyn atap ótti.
— Bul kadrlardy kórgende júrek qan jylaıdy. Dendropark — Shymkenttiń sáni edi, al qazir qýrap barady. Der kezinde shara qoldanylmasa, uzaq jyldar boıy qurylǵan erekshe orman alqabynan aıyrylyp qalýymyz ábden múmkin, — deıdi qala turǵyny.
Qalanyń janashyrlary úkimetten jasyl fondtyń baqylaýyn kúsheıtip, sýarý jumystaryn jiti tekserýdi talap etip otyr.
Shymkenttiń jaıly ortany damytý basqarmasy qylqan japyraqty aǵashtardyń qýraýyn kóktemgi úsikpen baılanystyrdy.
— Naýryz aıynda aýa temperatýrasynyń -14°C-qa kúrt tómendeýi tirkelgen. Aýa raıynyń tosyn qubylýy qylqan japyraqty aǵashtardyń kúıine keri áserin tıgizdi. Úsik saldarynan ósimdik jasýshalary buzylyp, fotosıntez protsesi baıaýlady, sonyń kesirinen qylqandar sarǵaıa bastady, — dep habarlady basqarmadaǵylar.
Jaýapty basqarma ókilderi qazir dendrosaıabaqtaǵy jasyl jelekti saqtap qalý úshin shuǵyl sharalar qabyldanyp jatqanyn málimdedi.
— Qazir arnaıy mamandar ormandy qalpyna keltirý jumystaryn júzege asyryp jatyr. Ósimdikterdiń jaǵdaıyn jaqsartyp, sapasyn arttyrý maqsatynda «Tsırkon», «Bona Forte» jáne «Edagým» atty tyńaıtqyshtar qoldanylady, — dep baıandady basqarma mamandary.
Shymkenttegi dendrosaıabaqtyń jaı-kúıi buǵan deıin de birneshe ret qoǵam talqysyna túsken. Buǵan deıin saıabaq aýmaǵynda kitaphana men shahmat klýbyn salý jospary jurtshylyq arasynda qyzý pikirtalas týdyrǵan edi. Sol kezde ákimdik ókilderi birde-bir aǵash kesilmeıtinin, al jańa nysandar aýmaqty kommertsııalandyrý úshin emes, kelýshilerge qolaıly jaǵdaı jasaý maqsatynda salynatynyn málimdegen bolatyn.
Dendrosaıabaqtaǵy jasyl jelektiń tozýyna adamdardyń kóptep kelýi, jappaı pıknık jasaý, serýendeý áreketteri sebep boldy.
Sondaı-aq, qalanyń eń áıgili saıabaǵynda beınebaqylaý júıesiniń nashar jumys isteıtini belgili boldy: mundaǵy 60 kameranyń tek 20 ǵana iske jaramdy eken.
Eske salaıyq, Shymkent dendrosaıabaǵy 1979 jyly burynǵy qoqys polıgonynyń ornynda qurylǵan. Óziniń gúldengen kezeńinde saıabaq aýmaǵy 151 gektardy alyp, onda 500 myńnan astam aǵash pen sırek ári ekzotıkalyq túrlerdi qosa alǵanda myńnan asa buta túri bolǵan.
Sońǵy jyldardaǵy qurǵaqshylyq pen sý tapshylyǵynan saıabaqtyń bıologııalyq ártúrliligi 2,5 esege qysqardy. Úsh jyl boıy durys sýarylmaǵandyqtan 8 myńǵa jýyq aǵash qýrap qaldy. Másele Báıdibek bı dańǵyly men Arǵynbekov kóshelerinde kólik torabyn salý kezindegi sý qubyrlarynyń zaqymdanýynan keıin bastalǵan.
2005 jyly jeke menshikke zańsyz ótip ketken dendroparktiń 28 sotyq jeri 2024 jyly memleket menshigine sátti qaıtaryldy.
Búginde Shymkenttegi dendrosaıabaqta 330-ǵa jýyq aǵash pen butaq túrleri bar.
