Shymkent dendrosaıabaǵynda buralqy ıtter áıelge shabýyl jasap, jaraqattady
ShYMKENT. KAZINFORM — Shymkenttegi dendrosaıabaqta serýendep júrgen áıeldi buralqy ıtter tistep aldy. Oqıǵadan keıin ol medıtsınalyq kómekke júginip, polıtsııaǵa aryzdanǵan.
Zardap shekken turǵynnyń aıtýynsha, ol dendrosaıabaqta kún saıyn keshki ýaqytta shamamen bir saǵat serýendeıdi.
— Ádettegideı saıabaqta serýendep júrgenmin. Velojolda kele jatqanymda taldardyń arasynan 10 shaqty ıt shyǵyp, maǵan tap berdi. Jaqyn jerdegi baǵanǵa baryp turdym. Eki ıt aıaǵyma jabysyp, bireýi qolymdy tistep jaraqattady. Kómek surap aıqaıladym. Adamdar ıtterden qorqyp, jaqyndaı almady. Keıin eki bala kelip, kómektesti. Olar jedel járdem shaqyrdy, — dedi turǵyn.
Oqıǵadan keıin áıel jaraqatyna baılanysty medıtsınalyq kómek alǵan. Sondaı-aq oǵan tıisti ekpeler salynǵan. Ol bolǵan jaǵdaıǵa baılanysty polıtsııaǵa aryz túsirgen.
Oqıǵaǵa qatysty Shymkent qalasy polıtsııa departamenti túsinikteme berdi. Polıtsııa málimetinshe, dendrosaıabaq aýmaǵynda buralqy ıtterdiń áıelge shabýyl jasaǵany týraly aqparat túskennen keıin qyzmetkerler oqıǵa ornyna jedel barǵan.
— Itterdi aýlaý jónindegi mamandandyrylǵan qyzmet shaqyrylyp, saıabaq aýmaǵynda qajetti jumystar júrgizildi. Ustalǵan ıtter tıisti qyzmet mamandaryna tapsyryldy, — delingen habarlamada.
Al Shymkent qalasy aýyl sharýashylyǵy jáne veterınarııa basqarmasynyń habarlaýynsha, dendrosaıabaq aýmaǵynan № 2 aýlaý brıgadasy 8 ıt ustap, ýaqytsha ustaý ortalyǵyna jetkizgen.
Vedomstvo ókilderiniń aıtýynsha, qaladaǵy qańǵybas janýarlar sanynyń kóbeıýine úı janýarlaryn qaraýsyz qaldyratyn ıeleriniń jaýapsyzdyǵy sebep bolyp otyr.
— Qala aýmaǵynda qaraýsyz qalǵan jáne buralqy janýarlardy aýlaý jumystary azamattardyń ótinimderi negizinde «Veterınarııalyq qyzmet» MKK-nyń aýlaý qyzmeti tarapynan izgilikti tásilmen, qarǵybaý qoldaný arqyly júzege asyrylady. Árbir kelip túsken ótinim boıynsha aýlaý jumystary turaqty júrgiziledi. Jalpy jyl basynan beri qalada 30 myńǵa jýyq buralqy ıt pen mysyq aýlandy, — dep málimdedi basqarma.
Resmı málimetke sáıkes, bıyl qalada janýarlarǵa jaýapkershilikpen qaraý salasyndaǵy zańnama talaptaryn saqtamaǵan 50-ge jýyq azamat ákimshilik jaýapkershilikke tartylǵan. Olarǵa jalpy 930 myń teńge kóleminde aıyppul salynǵan.
Buǵan deıin Shymkenttegi saıabaqta attraktsıonnyń trosy úzilip, qyz balanyń qoly synǵanyn jazǵan edik.
