Shymkent aınalma jolyndaǵy beton jabyndynan aqaý anyqtaldy
ASTANA. KAZINFORM – Shymkent qalasynyń soltústik aınalma jolyndaǵy tsementbeton jabyndysynyń bir bóliginde aqaý anyqtalyp, profılaktıkalyq jumystar bastaldy, dep habarlaıdy «QazAvtoJol».
7 maýsymda avtomobıl joldarynyń jaı-kúıine júrgizilgen josparly monıtorıng barysynda «QAJservıs» JShS Túrkistan oblystyq fılıalynyń mamandary respýblıkalyq mańyzy bar KZ17-01 Shymkent qalasynyń soltústik aınalma jolynyń 2257+300 shaqyrym ýchaskesinde tsementbeton jabyndysynyń aqaýyn tirkedi.
Aldyn ala málimet boıynsha, aqaýdyń paıda bolýyna aýa temperatýrasynyń +35...+37 gradýsqa deıin kúrt kóterilýi sebep bolýy múmkin. Mundaı jaǵdaıda beton plıtalary keńeıip, jol jabyny ishinde qosymsha kerneý qalyptasady.
- Jol qozǵalysynyń qaýipsizdigin qamtamasyz etý jáne aqaýdyń ulǵaıýyna jol bermeý maqsatynda atalǵan ýchaskede jedel profılaktıkalyq jumystar uıymdastyryldy.
Qazir mamandar jol jabynynyń tehnıkalyq jaı-kúıin tekserip, júrý bóligin qalpyna keltirý boıynsha qajetti sharalardy qabyldap jatyr.
Jumys júrgizilip jatqan aýmaqta ýaqytsha jol belgileri ornatylǵan. Qozǵalys qaýipsizdigin jol qyzmetteri qamtamasyz etýde, - delingen aqparatta.
Osyǵan baılanysty júrgizýshilerge belgilengen jyldamdyq rejımin saqtap, ýaqytsha jol belgileriniń talaptaryn oryndaý jáne atalǵan ýchaskeden ótý kezinde barynsha muqııat bolý usynyldy.
«QazAvtoJol» ulttyq kompanııasynyń málimetinshe, jaz mezgilinde respýblıkalyq mańyzy bar avtomobıl joldaryndaǵy tsementbeton jabyndarynyń jaı-kúıine turaqty monıtorıng júrgiziledi. Bul jumystar yqtımal aqaýlardy der kezinde anyqtap, jedel sharalar qabyldaýǵa múmkindik beredi.
Aıta keteıik, Almatyda LEZ jobasy aıasynda jol belgileri ornatylyp jatyr.
