Shymkent áýejaıyndaǵy aqyly turaq baǵasy júrgizýshiler narazylyǵyn týdyrdy

ASTANA. KAZINFORM – Shymkent turǵyndary qalanyń jańa áýejaıy janyndaǵy turaq qunyna shaǵym jasady.

Áleýmettik jelide «Áýejaıǵa kireberiske tym «arzan» tólemaqy engizip qoıǵan joqsyzdar ma?» degen saýalmen jarııalanym shyqqannan keıin daý týyndady. Jeli qoldanýshylary 15 mınýttyq tegin ýaqytta kezeke baılanysty úlgermeıtinin aıtyp jatyr

- Tıisti organdardan mundaı tarıftiń zańdylyǵyn tekserýin ótinemiz, - dep jazdy qalalyqtar.

Kireberiske deıin metr boıynsha tarıf

Shymkent ákimdiginiń túsindirýinshe, tarıf termınaldiń kireberisine deıingi qashyqtyqqa baılanysty, jaqyn bolǵan saıyn qymbattaı túsedi.

- birinshi jolaq (kire beristiń dál aldy) – kólik 15 mınýttan artyq turǵany úshin 10 myń teńge;

- ekinshi jolaq (shamamen 5 metr) – 15 mınýttan artyq turǵany úshin 2 myń teńge, odan keıin ár saǵatqa 2 myń teńge;

- jalpy turaq (termınaldan 30-40 metr) – 12 saǵatqa deıin 200 teńge, 12-den 24 saǵatqa deıin 3 myń teńge, odan keıin táýligine 2 myń teńge.

Shymkent ákimdigi tarıftiń zańdy belgilengenin alǵa tartady. Áýejaı ıesi «SCAT» AQ-qa jańa termınal qurylysyna jumsaǵan 24 mlrd teńge qarajatyn qaıtaryp alý úshin aqyly turaq tarıfin derbes aıqyndaýǵa ruqsat berilgen.

- Mundaı qomaqty qarjy salǵan ınvestor shyǵynynyń bir bóligin qaıtaryp alýǵa quqyly. Áýejaı aldyndaǵy jer parkıng úshin ýaqytsha jalǵa berilgen jáne kásipker zań aıasynda tarıf bekitti, - dep atap ótti Shymkent qalasy ákiminiń orynbasary Sársen Quranbek.

Alaıda, bir nıýans bar. Buǵan deıin ákimdiktiń resmı saıtynda jarııalanǵan aqparatqa sáıkes, 2020 jyly termınal aldynda avtoturaq salýǵa Shymkent bıýdjetinen qarjy qarastyrylyp, 912 mln teńge bólingen edi. Al endi bul aýmaq jeke kompanııaǵa tabys ákelip otyr.

Aıta keteıik, osy jyldyń sáýirinde Qasym-Jomart Toqaev Shymkent áýejaıynyń jańa termınalymen tanysqan edi.