Shymkent áýejaıynda FlyArystan ushaǵy ıtti qaǵyp ketti

ShYMKENT. KAZINFORM – Oqıǵa jolaýshylar reısi qonǵannan keıin bolǵan. 

FlyArystan áýe kompanııasy 15 sáýir kúni Almaty – Shymkent baǵyty boıynsha FS7105 reısi qonǵannan keıin Shymkent áýejaıynyń ushý-qoný jolaǵynda ushaq pen ıttiń soqtyǵysqanyn rastady.

– Saldarynan áýe kemesiniń keıbir bólshekteri zaqymdandy. Qazirgi ýaqytta aýystyrylýy tıis barlyq qosalqy bólshek Almatydan jetkiziledi, - dep habarlady áýe kompanııasynyń baspasóz qyzmeti. 

Qazirgi tańda áýe kompanııasy oqıǵanyń mán-jaıy anyqtalyp jatqanyn málimdedi. 

– Bul derek boıynsha tekserý júrgizilip jatyr. Ushý qaýipsizdigi áýe kompanııasynyń negizgi basymdyǵy sanalady, - dep naqtylady FlyArystan ókilderi.

Sondaı-aq ıttiń ushý-qoný jolaǵyna qalaı kirip ketkeni de tekserilip jatyr. 

Budan buryn Shymkent áýejaıynda eski ushý-qoný jolaǵy reısterge kedergi keltirgenin jazǵan edik.